तीनकुनेको घटना आपराधिक मानसिकताको उपज : उपेन्द्र यादव

भक्तपुर । जनता समाजवादी पार्टीका अध्यक्ष उपेन्द्र यादवले चैत १५ गतेको काठमाडौंको तीनकुनेको घटनालाई आपराधिक भएको बताएका छन् । उनले यद्यपि, लोकतन्त्रमा सबैले आआफ्नो विचार राख्न र बोल्न पाउने भएता पनि त्यस दिनको उग्र गतिविधि अपराध गर्ने मानसिकताबाट ग्रसित भएको बताए ।

रफत सञ्चारक्लब भक्तपुरको ओजनामा आज भएको पत्रकार सञ्चार संवाद कार्यक्रममा उनलृे भने, राजतन्त्र फर्काउने नाममा १५ गते काठमाडौको तीनकुनेमा भएको हत्या, आगजनी र तोडफोडले लोकन्तान्त्रिक पद्धतिको खिल्ली उडाएको र त्यसदिनको सम्पूर्ण गतिविधि हिंसात्मक र आपराधिक रहेकाले दोषीहरुलाई कारवाहीको दायरामा ल्याउनु पर्ने बताए । हरेक परिवर्तनसँगै नेपालीले व्यवस्था बदलेता पनि अवस्था परिवर्तन गर्नेतर्फ राजनीतिक दलहरु नलागेकाले राजनीतिक दलप्रति आक्रोश बढेको यादवले बताए । सरकार संसद् र सिंहदरबारमा मजबुत रहेता पनि जनता माझ कमजोर रहेको यादवको भनाइ छ ।

३५ वर्षदेखि सत्ताको बागडोर सम्हालेका राजनीतिक दलहरुले जनतालाई के दिए ? किन जनताको दलहरुप्रति आक्रोश बढिरहेको छ ?आत्म अध्ययन र समीक्षा गर्न नसके देशमा ठूलो दुर्घटना हुने यादवले बताए । एकात्मक राज्यव्यवस्थाको अन्त्य गर्दैै लोकतान्त्रिक गणतन्त्रको स्थापना भइसकेको अवस्थामा एकात्मक शासन र हिन्दु राज्यसहितका राजतन्त्र स्थापना गर्ने भन्दै सल्बलाउनुको पछि पनि राजनीतिक दलहरुकै कमजोर उपस्थिति रहेको यादवले बताए

सरकारमा सामेल एमाले र कांग्रेसका संसदमा बहुमत संख्या रहेको दम्भ संसदमै सीमित रहेको बताउँदै उनले भने, बंगलादेश र श्रीलंकामा बहुमत रहेको राज्यसत्ता जन आक्रोशको शिकार बनेको बेलैमा राजनीतिक दलहरुले बुझ्नु पर्दछ, अन्यथा संसदको बहुमतले होइन जनताले पाठ सिकाउने छन् ।

बिचौलीया, भ्रष्ट र कमीशनखोरको बिगबिगीकै कारण नेपाल सरकारप्रति जनता रुष्ट रहेको बताउँदै राजनीतिक दलहरुले बेलैमै सुधारतर्फ ध्यान दिन नसके देशको अवस्था झनै दयनीय बन्ने यादवले बताए । संघीय सरकारले नै संघीयताको सबल कार्यान्वयनमा अवरोधको भूमिका निर्वाह गरेको र प्रदेशलाई प्रदान गरिएका अधिकारमा रोक लगाएको बताउँदै उनले प्रहरी समायोजन एेन, कर्मचारी समायोजन ऐनलगायत विभिन्न विषय अल्झाएर काम गर्न असक्षम बनाएको बताए ।

वन विधेयक भू-माफिया र रियल स्टेटका व्यापारीको पक्षपोषण गर्दै वन विनाशको माध्यम बन्ने भएकाले आफ्नो पार्टीले त्यसको विरोध गरेको र सो विधेयक रोकिसकेकोल अन्य विधेयकका विषयमा समर्थन गर्ने उनले बताए । संघियतामा तीन प्रदेश भइसकेको र प्रदेश सरकार रहेकाले ७७ जिल्ला कामय गर्नु थप भार बोक्ने काम रहेको यादवको भनाइ छ ।