जुवातास खेलिरहेको अवस्थामा दाङ र झापाबाट १३ जना पक्राउ

काठमाडौं । जुवातास खेलिरहेको अवस्थामा दाङ र झापाबाट १३ जनालाई प्रहरीले पक्राउ गरेको छ ।

दाङको तुल्सीपुर उपमहानगरपालिका–८ नयाँबस्ती बस्ने झुपराज घर्तीमगरको घरमा जुवातास खेलिरहेको अवस्थामा प्रहरीले झुपराज समेत ६ जनालाई शनिबार दिउँसो पक्राउ गरेको छ । प्रहरीले उनीहरूलाई नगद ५३ हजार ९ सय ८० रूपैयाँ र ३ बुक तास सहित पक्राउ गरेको हो ।

त्यस्तै, झापाको दमक नगरपालिका–१० सेतुमारीस्थित खेतमा रहेको गोठमा जुवा (कौडा) खेलिरहेको अवस्थामा प्रहरीले सोही नगरपालिका–१० बस्ने ३८ वर्षीय विकाश राई समेत ७ जनालाई गए राति पक्राउ गरेको छ । प्रहरीले उनीहरूलाई नगद १ लाख ७६ हजार ४ सय ९० रूपैयाँ सहित पक्राउ गरेको हो ।

यस सम्बन्धमा प्रहरीले आवश्यक अनुसन्धान गरिरहेको छ ।