सामान्य अंकले बढ्यो सेयर बजार, ११ अर्ब ७२ करोडको कारोबार

काठमाडौं । नेपाल स्टक एक्सचेञ्ज (नेप्से) साताको पहिलो दिन आइतबार नेप्से परिसूचक सामान्य अंकले बढेको छ । आज नेप्से परिसूचक ४ दशमलव ९८ अंकले बढेर दुई हजार ७ सय ५३ दशमलव ७६ को विन्दुमा पुगेको छ ।

आज करिब पौने १२ अर्ब अर्थात् ११ अर्ब ७२ करोड ६७ लाख ५६ हजार रुपैयाँ बराबरको २ करोड ४४ लाख २६ हजार ९०० कित्ता शेयर खरिदबिक्री भएको छ ।

आज १३ मध्ये ९ उपसमूहको शेयर बढेको छ भने बैंक, फाइनान्स, उत्पादन र प्रशोधन तथा निर्जीवन बीमा उपसमूहको शेयर घटेको छ । १४५ कम्पनीको मूल्य बढ्दा ९२ को घट्यो भने ६ को स्थिर रहेको छ ।

आज उन्नति सहकार्य लघुवित्त, स्वाभिमान लघुवित्त र उपर हेवाखोला हाइड्रोको शेयरमा सकारात्मक सर्किट लागेको छ । यस्तै, समृद्धि फाइनान्स र गुराँस लघुवित्तको शेयरमा भने नकारात्मक सर्किट लागेको छ ।