आजदेखि लागू भयो निर्वाचन आचारसंहिता

भक्तपुर न्यूज

२ मंसिर २०८१ १२:०६

काठमाडौं । आसन्न स्थानीय तह उपनिर्वाचनका लागि आजदेखि निर्वाचन आचारसंहिता लागू भएको छ । निर्वाचन आयोगका अनुसार आजदेखि उपनिर्वाचन हुने सम्बन्धित जिल्लाभित्र सार्वजनिक पद धारण गरेका व्यक्ति, निकाय तथा अधिकारीलाई निर्वाचन सम्पन्न नभएसम्म आचारसंहिता लागू गर्ने निर्णय गरेको हो ।

आचारसंहिता लागू भएको जिल्लाका निर्वाचन हुने स्थानीय तहबाहेक अन्य क्षेत्रमा निर्वाचन आचारसंहिताले निषेध गरेका कार्य गर्नुरगराउनु परेमा निर्वाचन आयोगलाई पूर्वजानकारी दिई निकास भएबमोजिम गर्न सकिने आयोगले जनाएको छ ।

आचारसंहिताविपरीतका कार्य भए/गरेको पाइएमा वा हुनसक्ने पर्याप्त आधार र कारण देखिएमा मौखिक, लिखित, सामाजिक सञ्जाल, विद्युतीय माध्यम वा अन्य कुनै तरिकाले उजुरी दिन पनि आयोगले आग्रह गरेको छ। आचारसंहिता उल्लंघन भएको पाइए कारबाही हुनेछ ।

यही मंसिर १६ गते हुने स्थानीय तह उपनिर्वाचनका लागि आज मनोनयनपत्र दर्ता हुँदैछ ।

विभिन्न कारणले स्थानीय तहमा रिक्त जिल्ला समन्वय समितिका प्रमुख दुई, गाउँपालिका अध्यक्ष दुई, उपाध्यक्ष चार, नगरपालिका प्रमुख र उपप्रमुख एक–एक र वडाध्यक्ष ३४ गरी जम्मा ४४ रिक्त पदमा निर्वाचन हुँदैछ ।

क–कसलाई लाग्छ आचारसंहिता ?

१. नेपाल सरकार र नेपाल सरकारका मन्त्री

२. प्रदेश सरकार र प्रदेश सरकारका मन्त्री

३. संवैधानिक निकाय र सो निकायका पदाधिकारी

४. नेपाल सरकार वा प्रदेश सरकारका निकाय र सो निकायका पदाधिकारी

५. स्थानीय कार्यपालिका र सोका सदस्य

६. सङ्घ, प्रदेश र स्थानीय तहका कर्मचारी

७. सुरक्षा निकाय, सुरक्षाकर्मी तथा कर्मचारी

८. सरकारी, अर्धसरकारी तथा सार्वजनिक संस्थाको कार्यालय र कर्मचारी

९. राजनीतिक दल तथा राजनीतिक दलको भ्रातृ सङ्गठन

१०. उम्मेदवार तथा सम्बन्धित व्यक्ति

११. राजनीतिक दल तथा उम्मेदवारको मतदान प्रतिनिधि तथा मतगणना प्रतिनिधि