अवैध औषधिसहित तीन जना पक्राउ

राजविराज, १० असार । सिमावर्ती क्षेत्रबाट साढे चार लाख मूल्य बराबरको औषधिसहित तीन जनालाई प्रहरीले आज पक्राउ गरेको छ । गैरकानुनी रुपमा आयात गरिएको साढे ४ लाख मूल्य बराबरको औषधिसहित सप्तरीको तिलाठी कोइलाडी–१ बाट प्रहरीले ३ जनालाई पक्राउ गरेको हो ।

प्रहरीले भारतबाट आयात गरिएको औषधिसहित सप्तरीको छिन्नमस्ता गाउँपालिका–५ का ४० वर्षीय रामविलास दास, ३० वर्षीय श्रवण सदा र ५० वर्षीय फुल्गेन सदालाई पक्राउ गरेको हो ।

उनीहरुको साथबाट डेक्ट्रोलिन, मोक्सी, क्रिटोजना, प्रिम्नोटकिट, मुल्टिभिट, वालकोवाल प्लसलगायत गरी ४ लाख ४२ हजार ४ सय रुपैयाँ बराबरको औषधी बरामद भएको सप्तरीका एसपी मुकेश सिंहले जानकारी दिए ।

पक्राउ परेका तीनै जनालाई प्रहरी चौकी तिलाठीमा राखिएको छ ।