काठमाडौं । कोरोना भाइरसविरुद्धको खोप बनाउँदा भारतमा गाईको बाच्छाको रगत प्रयोग गरिएको विषय बाहिर आएको छ ।
भारतको बायोटेक कम्पनीद्धारा उत्पादित कोभाभ्याक्सिन नामक खोपमा बाच्छाको रगत प्रयोग भएको भन्दै विपक्षी दलले आरोप लगाएपछि तरङ्ग पैदा भएको छ । विपक्षीले आवाज उठाएसँगै बच्चाको रगतको प्लाज्मा अर्थात सेरम प्रयोग गरिएको विषय अहिले भारतमा चर्चा, विवाद र बहसको विषय बनेको छ ।
यही विषयलाई लिएर विपक्षीले प्रधानमन्त्री नरेन्द्र मोदी नेतृत्वको सरकारको आलोचना गरिरहेका छन् । खोप निर्माणता कम्पनीले भने कोभाभ्याक्सिन अनुसन्धानको प्रारम्भिक चरणमा कोशिका विकसित गर्नका लागि गाईको बाच्छाको सेरम प्रयोग गरिएको स्वीकार गरेको छ ।
तर कोभाभ्याक्सिनको अन्तिम उत्पादनमा भने बाच्छाको रक्तप्लाज्मा अर्थात् सेरम प्रयोग नभएको बताएको छ । कोशिका निर्माणका लागि सुरुमा बाच्छाको रगतको भाग प्रयोग भए पनि अन्तिममा नष्ट गरेर निष्प्रभावी बनाइएका भाइरसलाई नै खोप बनाउनका लागि प्रयोग गरिएको खोप निर्माता कम्पनीको जिकिर छ ।
भारतीय काङ्ग्रेसका राष्ट्रिय संयोजक गौरव पान्धीले कोभ्याक्सिनमा गाईको बाच्छाको सेरम प्रयोग गरिएको आरोप लगाएका थिए । सूचनाको हक प्रयोग गरेर माग गरिएको दस्तावेजबाट पनि गाईको बाच्छाको रगत प्रयोग गरेर खोप बनाइएको पुष्टि हुने उनको दाबी थियो ।
भारतको केन्द्रीय स्वास्थ्य मन्त्रालयले यस विषयलाई तोडमोड गर्न खोजिएको जनाएको छ । कोभ्याक्सिनमा २० दिनभन्दा कमको बाच्छाको सेरम प्रयोग हुनेभन्दै तथ्यलाई बङ्ग्याउन खोजिएको उनसले जनाएको छ ।
नवजात बाच्छाको सेरम भेरो कोशिका तयार गर्न तथा विकास गर्नका लागि प्रयोग हुने मन्त्रालयले जनाएको छ । त्यस्ता कोशिकाहरु पोलियो, रेबिज तथा इन्फ्लुएन्जालगायतका खोपको विकास र उत्पादनमा समेत उपयोगी हुने मन्त्रालयको भनाइ छ । एजेन्सी
प्रकाशित मितिः २०७८ असार ०४ शुक्रबार
Comments