भक्तपुर । रगत नपाए भक्तपुर जानु भन्ने नारामा प्रतिवद्ध नेपाल रेडक्रस सोसाइटी जिल्ला शाखा भक्तपुरले कोरोना भाइरस रोकथामका लागि जिल्ला भित्रका नगरपालिकाहरुलाई एक लाख रुपैयाको दरले सहयोग गर्ने भएको छ ।
जिल्ला कार्यसमितिको बैठकले जिल्लाका चारवटा नगरपालिकाहरु क्रमशः भक्तपुर, चाँगुनारायण, मध्यपुर थिमि र सुर्यविनायकलाई एक लाख रुपैयाका दरले उपलब्ध गराउने निर्णय गरेको हो ।
लकडाउनका कारण ज्यालामजदुरी गर्ने र निम्न आयभएका वर्गलाई नगरपालिकाहरुले राहत वितरण गर्न सुरु गरेकाले सोहि कार्यमा सहयोग पुर्याउने उद्देश्यले सो रकम सहयोग गरेको हो ।
बैठकले कोभिड १९ बारे जनचेतना फैलाउन सबै नगरपालिकामा माइकिङ गर्ने निर्णय पनि गरेको छ । यस्तै जिल्लाका जुनसुकै स्थानमा क्वारनटाइन निर्माण तथा व्यवस्थापनको लागि जिल्ला शाखामा उपलब्ध सामाग्रीहरु सहयोग गर्ने र जिल्लाबाट सञ्चालित एम्बुलेन्स र रक्तसञ्चार सेवालाई गुणस्तरीय रुपमा सञ्चालन गर्ने पनि निर्णय गरेको जिल्ला शाखाका सभापति मनोजकुमार थापाले जानकारी दिए ।
अहिलेको परिस्थितीमा पनि नियमित रगतको व्यवस्थापनमा सहयोग पुर्याउनुहुने स्वयंसेवी रक्तदाता समाज ९ब्लोदान०, स्वयंसेवी रक्तदाता, नेरेसो काठमाडौं जिल्ला शाखा, नेरेसोका उपत्यका भित्रका उपशाखाहरु, विभिन्न सहकारी, राजनैतिक दल र संघसंस्थालाई धन्यवाद दिने निर्णय पनि जिल्ला कार्यसमिति बैठकले गरेको जिल्ला शाखाका मन्त्री परशुराम पाण्डेले बताए ।
प्रकाशित मितिः २०७६ चैत्र २६ बुधबार
Comments