काठमाडौं । प्रधानमन्त्री कपमा फाइनलमा स्थान बनाउनका लागि जित्नै पर्ने खेलमा विभागीय क्लव त्रिभुवन आर्मी क्लवले गण्डकी प्रदेशलाई पराजित गर्दै फाइनलमा पुलिससँगको भेट पक्का गरेको हो ।
बिहिबार किर्तिपुरस्थित त्रिवि क्रिकेट मैदानमा भएको खेलमा आर्मीले दिएको १३३ रनको लक्ष्य पछ्याउने क्रममा गण्डकी २३.४ ओभरमा ६४ रनमा समेटियो । गण्डकीका दुई खेलाडीले मात्र दोहोरो अंकको रन बनाए । इश्वर क्षेत्रीले १६ र करन पंगेनीले १५ रन जोड्नु बाहेक अन्य खेलाडी सस्तैमा आउट भए । गण्डकीका कमल परियार पहिलो इनिङमा घाइते भएपछि ब्याटिङ गर्न आएनन् ।
आर्मीका लागि शाहब आलमले चार तथा जितेन्द्र मुखिया र कुशल मल्लले दुई दुई विकेट लिए । यसअघि टस जितेर पहिला ब्याटिङ गरेको आर्मी ३९.१ ओभरमा १३२ रनमा अलआउट भएको हो ।
आर्मीका लागि इमरान शेखले सर्वाधिक ३४ रनको योगदान गरे । पहिलो विकेटका रुपमा आर्मीले छैटौं ओभरमो दोस्रो बलमा ९ रनको अवस्थानमा दुई रन बनाएका सन्तोष कार्की आउट भएका थिए । दोस्रो विकेटका रुपमा खेलको १५ औं ओभरको अन्तिम बलमा १० रन बनाएका भिम सार्कीलाई आर्मीले गुमाएको थियो । खेलको १७.४ ओभमरमा ओपनर इमरानलाई ५४ रनको अवस्थामा गुमाएको हो । त्यसपछि आर्मीले लगातार विकेट गुमाएको हो । सन्दीप रजाइली र बसिर अहमदले खाता नै खोल्न सकेनन् । विवेक यादव एक रन बनाउँदै खेलको २१ औं ओभरको अन्तिम बलमा गुमाएको हो । कुशल मल्ल १५ रन बनाउँदै खेलको २४.४ ओभरमा ८० रन जोड्दा सातौं विकेटको रुपमा गुमायो । त्यसपछि ११२ रन जोड्दा खेलको ३४.४ ओभरमा १९ रन बनाएका विनोद भण्डारीलाई गुमायो ।
आर्मीले खेलको ३५.३ ओभरमा २३ रन बनाएका सोमपाल कामीलाई ११६ रनमा गुमाएको हो । अन्तिम विकेटका रुपमा ३९.१ ओभरमा ८ रन बनाएका जितेन्द्र मुखिया आउट भएसँगै आर्मी १३२ रनमा समेटियो । आर्मीका लागि शाहब आलमले अविजित १२ रन बनाए ।
गण्डकीका लागि विपिन कार्की, अमृत गुरुङ, कृष्ण पौडेल र कमल परियारले दुई दुई विकेट लिँदा सन्दिप पराजुली र रोशन गौतमले एक एक विकेट लिए । आर्मीले अब उपाधिका लागि शीर्ष स्थानमा रहेको पुलिससँग शनिबार खेल्ने छ ।
प्रकाशित मितिः २०८० माघ १८ बिहिबार
Comments