काठमाडौं । उत्तर कोरियाका सर्वोच्च नेता किम जोङ उनले अमेरिका र दक्षिण कोरियासँगको सम्भावित द्वन्द्वमा आणविक हतियार उपयोग गर्न सकिने चेतावनी दिएको त्यहाँको सरकारी सञ्चारमाध्यमले बिहीवार खबर दिएको छ ।
ती दुई मुलुकले कोरियाली प्रायद्वीपलाई युद्धको संघारमा पुर्याएको भन्दै उनले कडा सम्बोधन गरेका छन् । सन् १९५० देखि १९५३ सम्म चलेको कोरियाली युद्ध अन्त्य भएको ६९ वर्ष पुगेको अवसरमा सम्बोधन गर्दै किमले देशका सशस्त्र बलहरू कुनै पनि संकटको सामना गर्न पूर्ण तयार रहेको बताए ।
आफ्नो देशको आणविक हतियार पनि मिसनको आवश्यकताअनुसार प्रयोग हुने उनको भनाइ छ । आफ्नो शत्रुतापूर्ण नीतिलाई जायज ठहर्याउनका लागि उत्तर कोरियालाई अमेरिकाले दानवीकरण गरेको आरोप किमले लगाए । नियमित रूपमा अमेरिका र दक्षिण कोरियाले संयुक्त सैन्य अभ्यास गर्दा अमेरिकाको दोहोरो मापदण्ड र अपराधीको जस्तो चरित्र देखिएको उनको भनाइ छ ।
आफू सैन्य अभ्यास गर्ने अनि उत्तर कोरियाले नियमित सैन्य गतिविधि (क्षेप्यास्त्र परीक्षण) गर्दा निन्दा गर्ने अमेरिकाको दोहोरो चरित्र भएको उनले बताए । दक्षिण कोरियामा राष्ट्रपति यून सुक योल नेतृत्वको सरकार भिडन्तका लागि आतुर पागल र अपराधीहरूले भरिएको भन्दै किमले कठोर आलोचना गरेका छन् ।
प्रकाशित मितिः २०७९ साउन १२ बिहिबार
Comments