काठमाडौं । लगातार वर्षाका कारण नदी तथा खोलाहरुमा पानीको सतह निरन्तर बढ्दो क्रममा रहेको मौसम विज्ञान विभाग अन्तर्गतको बाढी पूर्वानुमान महाशाखाले जनाएको छ ।
महाशाखाले इलाम, झापा, मोरङका धेरै स्थानमा हाल भारी वर्षा भइरहेको र थप वर्षाको सम्भावना रहेकाले मेची, विरिङ, निन्दा, कन्काई, चिसाङखोला, मावा–रतुवा, लोहन्द्रा, बक्राहा, नुनखोलासहित अरु साना खोलामा सतर्कता तह आसपासको बाढी आउन सक्ने, होचा स्थानमा डुबान हुन सक्ने भएकाले दिनभर र रातिसम्म नै सतर्कता अपनाउन आग्रह गरेको छ ।
यस्तै रौतहटको कर्मैया पधेरादोभान स्थित बागमती नदीमा जलसतहले सतर्कता तह पार गरेको र बढ्दो क्रममा रहेकाले तटीय क्षेत्रहरु र डुबान भइरहने होचा स्थानका बासिन्दाले उच्च सतर्कता अपनाउनु पर्ने महाशाखाले जनाएको छ ।
तनहुँको विमलनगरस्थित मर्स्याङ्गदी नदीमा जल सतहले सतर्कता तह पार गरेको र बढ्दो क्रममा रहेकोले तटीय क्षेत्रमा उच्च सतर्कता अपनाउन पनि आग्रह छ ।
यसैगरि बाराको सिमरा विमानस्थल र आसपासको क्षेत्रमा भारी वर्षा भएकाले सो क्षेत्रका ससाना खोलाहरुमा आकश्मिक बहाव आउन सक्ने भएकाले डुबान भइरहने होचा क्षेत्रका बासिन्दालाई सचेत रहन भनिएको छ ।
अहिले मनसुनी वायु सक्रिय अवस्थामा रहेकाले देशभर बदली तथा वर्षा भरहेकाले सबै क्षेत्रका बासिन्दा सचेत रहनु पर्ने उल्लेख छ।
प्रकाशित मितिः २०७८ असार १९ शनिबार
Comments