काठमाडौँ । बिश्वभर कोरोना भाइरसको सङ्क्रमण पुष्टि भएर उपचार गराइरहेकामध्ये आज बिहीबार बिहानसम्ममा एक लाखभन्दा बढी सङ्क्रमितको स्वास्थ्य अवस्था निक्कै खराब रहेको छ ।
स्वास्थ्य अवस्था खराब रहेकाहरुको चिन्ताजनक अवस्थामा उपचार भइरहेको छ । विश्वमा कोरोना सङ्क्रमित एक करोड ६३ लाख १२ हजार सात सय १४ जनाको उपचार भइरहेको छ । उपचाररतमध्ये हालसम्म एक लाख एक सय २४ जनाको अवस्था गम्भीर रहेको हो ।
विश्वका विभिन्न मुलुकमध्ये सबैभन्दा धेरै भारतमा आठ हजार नौ सय ४४ जनाको अवस्था गम्भीर छ । त्यसपछि ब्राजिलमा आठ हजार तीन सय १८ र अमेरिकामा सात हजार छ सय ६१ जनाको स्वास्थ्य अवस्था निक्कै खराब रहेको छ । यी तीन मुलुकमा मात्रै २४ हजार नौ सय २३ सङ्क्रमितको अवस्था जटिल छ ।
विश्वमा सङ्क्रमण पुष्टि भएकामध्ये १४ करोड ५७ लाख ८२ हजार सात सय १६ जनाको उपचार सम्भव भएको छ । उपचार सम्भव भएकाहरु कोरोनामुक्त हुँदै सामान्य जीवनमा फर्किएका छन् ।
हालसम्म १६ करोड ५५ लाख २६ हजार दुई सय ४१ जनामा सङ्क्रमण पुष्टि भइसकेको छ । पछिल्लो २४ घण्टामा विश्वभर छ लाख ४० हजार छ सय ६८ जना नयाँ बिरामी थपिए ।
एकै दिन १२ हजार पाँच सय ९३ जनाको मृत्यु भयो । विश्वमा कोरोनाका कारण मृत्यु हुनेको सङ्ख्या ३४ लाख ३० हजार आठ सय ११ पुगेको छ ।
प्रकाशित मितिः २०७८ जेठ ६ बिहिबार
Comments