एजेन्सी, २१ मंसिर । न्युजिल्यान्डका प्रधानमन्त्री जोन कीले हिजो पदबाट राजीनामा दिएका छन् । ८ वर्षदेखि सत्तामा रहेका किले हिजो आकस्मिक रूपमा राजीनामा दिएका हुन् । राजीनामाको घोषणा गर्दा उनको गला अवरुद्ध भएको थियो ।
कीले आगामी वर्ष हुने आमचुनावमा चौथो कार्यकालका लागि उठ्ने अनुमान गरिँदै आएको थियो । आफ्नो आठवर्षे कार्यकालमा पारिवारिक सुखशान्तिको कुनै चिन्ता नै नगरी राष्ट्रका निम्ति निरन्तर योगदान पुर्याएको, जनताप्रति समर्पित रहेको, कहिल्यै पनि बदनाम हुनु नपरेको, जनतामाझ लोकप्रियता कमाएको र न्युजिल्यान्डको राजनीतिक शिखरमा पुगेको परिप्रेक्ष्यमा सबैले वाहवाह गरिरहेकै बखत पदत्याग गर्नु उचित लागेरै राजीनामा दिएको उनले बताए ।
कीको दल नेसनल पार्टीको केन्द्रीय भेला आगामी डिसेम्बर १२ मा हुँदै छ । उक्त भेलाले पार्टीका नयाँ प्रमुख र प्रधानमन्त्रीको उम्मेदवारको पनि चयन गर्नेछ । सोही दिन न्युजिल्यान्डका राष्ट्रप्रमुख गभर्नर जनरलसमक्ष औपचारिक राजीनामा पेस गर्ने आफ्नो कार्यक्रम रहेको प्रधानमन्त्री कीले बताए । न्युजिल्यान्डका विपक्षी नेता एन्ड्र्यु लिटिलले प्रधानमन्त्रीको निर्णय सबैका लागि आश्चर्य भएको बताए ।
संवैधानिक परिवर्तनको प्रस्ताव जनमत संग्रहले अस्वीकृत गरेपछि इटालीका प्रधानमन्त्री माटिओ रेन्जीले पनि पदबाट राजीनामा दिने घोषणा गरेका छन् । यसबाट इटाली राजनीतिक र आर्थिक अनिश्चिताको भुमरीमा फसेको छ । पराजयपछि चिगी दरबारमा इटालियन र युरोयिन युनियनको झन्डामुनि बोल्दै रेन्जीले आफूले पराजयको जिम्मा लिने बताए । ‘पराजयको सम्पूर्ण जिम्मा म लिन्छु,’ उनले भने, ‘सरकारको मेरो अनुभव यही अन्त्य हुन्छ ।’ उनले राष्ट्रपति सेर्गिओ माटारेलासमक्ष राजीनामा दिने पनि बताए । राष्ट्रपतिले नयाँ प्रधानमन्त्री नियुक्त गर्ने या नयाँ चुनाव गराउनेमध्ये एक निर्णय लिनेछन् ।
प्रधानमन्त्री रेन्जीको पराजय र अस्थिरताको सीधा असर बजारमा पर्ने बताइएको छ । रेन्जीले केन्द्रीय सरकारलाई बलियो बनाउँदै माथिल्लो सदन सिनेटलाई कमजोर बनाउने प्रस्ताव गरेका थिए । विपक्षी तथा प्रधानमन्त्री रेन्जीकै दलका केही सदस्यहरूले प्रस्तावित परिवर्तनले प्रधानमन्त्रीलाई धेरै शक्ति दिन खोजिएको भन्दै आलोचना गरेका थिए ।
न्युजिल्यान्ड र इटालीका प्रधानमन्त्रीले दिए राजीनामा
0
Share.
Comments