काठमाडौं । सत्तारुढ नेपाल कम्युनिष्ट पार्टी (नेकपा) को आज (मंगलबार) को स्थायी कमिटी बैठक मा शुरुमै कुर्सीको विवाद उठ्यो ।
बैठक को शुरुवातमै उठेको कुर्सीको विवाद हल गर्न मञ्चमा रहेका शीर्ष नेताहरुलाई पनि अन्य सहभागीसँगै हलमा झारेर कुर्सी व्यवस्थापन गरिएको छ । शीर्ष नेताहरुलाई पनि अन्य सदस्यहरुसँगै राखेपछि तत्कालका लागि देखिएको विवाद हल भएको हो ।
पहिलो दिनको बैठक
स्थायी समितिको यसअघि तीन दिन बसेको बैठकमा दुई अध्यक्षसहित वरिष्ठ नेता, उपाध्यक्ष र सचिवालयका अन्य सदस्यहरु मञ्चमा र स्थायी समितिका सदस्यहरु अलि तल राखिएको थियो ।
दोस्रो र तेस्रो दिनको बैठक
सचिवालय सदस्यहरु मञ्चमा रहे पनि दुई अध्यक्षका लागि र अन्य सदस्यहरुका लागि भिन्दाभिन्दै कुर्सी व्यवस्था गरिएको थियो । यसले नेताहरुबीच विभेद कायम गरेको भन्दै केही नेताहरुले असन्तुष्टि जनाउँदै आएका थिए ।
चौथो दिनको बैठक
आज (मंगलबार) बैठक शुरु भएपछि नेताहरुबीचमै विभेद देखिएको भन्दै एकरुपता कायम गर्न माग भएपछि सबैलाई एकै ठाउँमा राखिएको हो ।
प्रधानमन्त्री ओलीका प्रेस सल्लाहकार सूर्य थापाले सामाजिक सञ्जालमा सार्वजनिक गरेको तस्विरमा दुई अध्यक्षसहित वरिष्ठ २ नेता र उपाध्यक्ष एउटै लाइनमा छन् भने सचिवालयका अन्य नेताहरु स्थायी समितिका सदस्यसँगै मिलाइएको कुर्सीमा बसेका देखिन्छन् ।
प्रकाशित मितिः २०७७ असार १६ मंगलबार
Comments