काठमाडौं । सत्ता गठबन्धनका चार दलको बैठक बालुवाटारमा जारी छ । राष्ट्रियसभा निर्वाचनको भागबन्डाबारे छलफल गर्न सत्ता गठबन्धनका नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी (जसपा) का शीर्ष नेताहरू सहभागी छन् ।
बैठकपछि साँझ ५ बजे प्रतिपक्षी नेकपा (एमाले) सँग छलफल गर्ने तयारी गठबन्धन दलको छ । आज बिहान कांग्रेस र माओवादीका नेताबीच छलफल भएको थियो । छलफलमा एमालेलाई राष्ट्रियसभामा भाग दिन नेताहरू लचक भएको बताइन्छ ।
शान्ति प्रक्रियालाई टुंग्याउने सहजताको लागि पनि सत्ता गठबन्धनले राष्ट्रियसभामा एमालेलाई पनि भागबण्डा दिने तयारी गरेका छन् । अहिले बसिरहेको गठबन्धनको बैठक र एमालेसँगको छलफलपछि उसलाई कसरी समेट्ने भन्ने टुंगो लाग्ने एक नेताले जानकारी दिए ।
माघ ११ गते हुने राष्ट्रियसभा सदस्यको निर्वाचनको लागि २३ पुसमा उम्मेदवारी दर्ता हुँदैछ ।
प्रकाशित मितिः २०८० पौष १८ बुधबार
Comments