काठमाडौं । राष्ट्रियसभाले अपांगता भएका व्यक्तिको अधिकार कार्यान्वयन सम्बन्धी संकल्प प्रस्ताव सर्वसम्मतिले पारित गरेको छ । अपांगता भएका व्यक्तिहरुका अधिकार कार्यान्वयन नभएको भन्दै त्यसका लागि नेपाली कांग्रेसका राष्ट्रियसभा सदस्य प्रकाश पन्थको संकल्प प्रस्ताव राष्ट्रियसभाले सर्वसम्मतिबाट पारित गरेको हो ।
अपांगता भएका व्यक्तिको अधिकार कार्यान्वयनका विषयमा सरकारका तर्फबाट प्रधानमन्त्री पुष्पकमल दाहाल ‘प्रचण्ड’ले जवाफ दिँदै अधिकार कार्यान्वयनको प्रतिबद्धता जनाए । राष्ट्रियसभाले अपांगता भएका व्यक्तिको अधिकार कार्यान्वयनसम्बन्धी संकल्प प्रस्तावलाई प्रधानमन्त्रीको प्रतिबद्धतासहित समेटेर एकीकृत कार्ययोजना बनाएर कार्यान्वयन गर्न सरकारलाई निर्देशन दिएको छ ।
राष्ट्रियसभाका अध्यक्ष गणेशप्रसाद तिमिल्सिनाले अपांगता भएका व्यक्तिको अधिकार कार्यान्वयनका लागि अन्तरमन्त्रालय, निकाय तह, सरोकारवाला निकायसँग समन्वय गरी कार्यान्वयन गर्न सरकारलाई निर्देशन दिए । उनले हरेक आर्थिक वर्ष समाप्त भएको तीन महिनाभित्र अपांगता भएका व्यक्तिको अधिकार कार्यान्वयनको अवस्था सम्बन्धी प्रगति विवरण सम्बन्धित प्रतिवेदन सभामा पेस गर्न निर्देशन दिए ।
उनले राष्ट्रियसभा अन्तर्गतका समितिहरुलाई आआफ्नो अधिकार क्षेत्रभित्र रहेर अपांगता भएका व्यक्तिको अधिकार कार्यान्वयनको अवस्था निरन्तर अनुगमन गर्न पनि निर्देशन दिएका छन् ।
प्रकाशित मितिः २०८० असोज २६ शुक्रबार
Comments