काठमाडौं । प्रधानमन्त्री पुष्पकमल दाहाल प्रचण्डले मनाङ एयरको हेलिकोप्टर दुर्घटनाप्रति दुःख व्यक्त गरेका छन्। प्रधानमन्त्री प्रचण्डले मंगलबार भएको दुर्घटनामा परी मृत्यु हुनुभएका यात्रुहरूप्रति भावपूर्ण श्रद्धासुमन अर्पण गर्दै शीघ्र र प्रभावकारी उद्धारका लागि नेपाल सरकारका सम्बन्धित संयन्त्रलाई निर्देशित गरेको सामाजिक सञ्जालमार्फत जानकारी गराएका छन्।
मंगलबार सोलुखुम्बुमा मनाङ एयरको हेलिकोप्टर दुर्घटनामा परेको थियो। बिहान १० बजेर ५ मिनेटमा सोलुखुम्बुको सुर्केबाट काठमाडौंका लागि उडेको 9N AMV कलसाइन रहेको हेलिकोप्टर दुर्घटनामा परेको हो।
सो हेलिकप्टर १० बजेर १३ मिनेटमा लुक्ला टावरमा अन्तिम पटक सम्पर्क भएको र तत्पश्चात् सम्पर्कमा आउन सकेको थिएन। सम्पर्कविहीन भएको हेलिकोप्टर खोजीका लागि सम्भावित क्षेत्रमा अल्टिच्युड एयरको दुई वटा हेलिकप्टर तथा नेपाली सेना र नेपाल प्रहरीका जवान समेत परिचालन गरिएको थियो।
पछि लिखुपिके गाउँपालिका-५को लामजुरा क्षेत्रमा दुर्घटनाग्रस्त अवस्थामा फेला परेको थियो। दुर्घटनाग्रस्त हेलिकोप्टरबारे स्थानीयले खबर सम्प्रेषण थिए। दुर्घटनामा परेको सो हेलिकोप्टरमा एक नेपाली पाइलट र पाँच मेक्सिकन यात्रु थिए।
प्रकाशित मितिः २०८० असार २६ मंगलबार
Comments