सुर्खेत । कर्णाली प्रदेश सरकारका नवनियुक्त दुईजना मन्त्रीले शपथ ग्रहण गरेका छन् । सोमबार आर्थिक मामिला तथा योजना मन्त्रीमा कृष्णा शाह र जलस्रोत तथा ऊर्जा विकास मन्त्रीमा रातो कामीलाई नियुक्त गरिएको थियो ।
सोमबार नै प्रदेश प्रमुख तिलक परियारले नवनियुक्त मन्त्री शाह र कामीलाई शपथ ग्रहण गराएको हो । योजना मन्त्री शाह र ऊर्जा मन्त्री कामीले सपथ लिएसँगै कार्यभार सम्हालेका छन् ।
माओवादी केन्द्रबाट योजना मन्त्री शाह जाजरकोटबाट निर्वाचित प्रदेशसभा सदस्य हुन् भने कामी रुकुम पश्चिमबाट निर्वाचित प्रदेशसभा सदस्य हुन् ।
नेकपा ९माओवादी केन्द्र०ले सरकारमा सहभागि दुईजना मन्त्री फिर्ता बोलाएर सदस्यद्वय शाह र कामीलाई सरकारमा पठाइएको हो ।
यस अघि माओवादी केन्द्रबाट योजना मन्त्रीमा विन्दमान विष्ट र ऊर्जा मन्त्रीमा गणेशप्रसाद सिंह थिए । उनीहरुलाई पार्टीले फिर्ता बोलाएपछि आइतबार राजीनामा दिएको थियो ।
शाह र कामीलाई मन्त्रीमा नियुक्त गरेसँगै कर्णाली प्रदेश सरकार समावेशी बनेको छ । मन्त्रिपरिषद्मा महिला र दलितको पनि सहभागिता रहेको छ । यस अघि अदालतको निर्देशनलाई लत्याउँदै मन्त्रीको सपथ गराए पछि सरकार असमावेशी भयो भन्दै चर्को आलोचना समेत हुँदै आएको थियो ।
कर्णालीमा नेपाली कांग्रेसको नेतृत्वमा माओवादी केन्द्र र एकीकृत समाजवादी पार्टी तीन दलिय गठबन्धनको सरकार रहेको छ । आठ सदस्यीय मन्त्रिपरिषदमा नेपाली कांग्रेसबाट मुख्यमन्त्री र दुई मन्त्री, माओवादी केन्द्रलाई तीन मन्त्री र एकीकृत समाजवादीलाई दुई मन्त्री रहेका छन् ।
प्रकाशित मितिः २०७९ भदौ १३ सोमबार
Comments