काठमाडौं । मौलिक र स्तरीय नबन्दा नेपाली चलचित्र विदेशी चलचित्रको चेपुवामा परेको निष्कर्ष निकालिएको छ । नेपाल अन्तर्राष्ट्रिय चलचित्र महोत्सव (निफ) अन्तर्गत ‘विदेशी चलचित्रको चेपुवामा नेपाली चलचित्र’ विषयक भर्च्युअल अन्तरक्रियामा चलचित्र निर्माता तथा निर्देशकहरुले उक्त निष्कर्ष निकालेका हुन् ।
उनीहरुले मौलिक कथावस्तुसहित बनेका स्तरीय नेपाली चलचित्रलाई विदेशी चलचित्रले खासै असर नपुर्याएको धारणा राखेका छन् ।
अन्तरक्रियामा नेपाल चलचित्र संघका अध्यक्ष मधुसुदन प्रधानले नेपाली चलचित्रहरु पनि अन्तर्राष्ट्रिय स्तरमा प्रतिस्पर्धा गर्ने स्तरका बनिरहेका बेला विदेशी चलचित्रले नेपालमा खासै प्रभाव नराख्ने बताए ।
उनले विषम परिस्थितिमा नेपाली चलचित्रलाई नयाँ ढंगले अगाडि बढाइनुपर्नेमा जोड दिए । ‘अब चलचित्र प्रदर्शन गर्दा हिन्दी चलचचित्रलाई भन्दा नेपाली चलचित्रलाई विशेष प्राथमिकतामा राखिनुपर्छ’, निर्मातासमेत रहेका प्रधानले बताए ।
नेपाल चलचित्र निर्माता संघका प्रथम उपाध्यक्ष माधव वाग्लेले नेपाली चलचित्र क्षेत्रमा सुरुदेखि नै विदेशी चलचित्रको प्रभाव रहँदै आएको स्पष्ट पारे ।
निर्माता अर्जुन कुमारले कम स्रोतसाधनले स्तरीय चलचित्र कममात्रै बनेकाले पनि विदेशी चलचित्रसँग प्रतिस्पर्धा गर्न नसकिएको बताए । ‘तसर्थ अब अन्तर्राष्ट्रिय स्तरमा प्रतिस्पर्धा गर्ने गरी स्तरीय चलचित्र निर्माणमा जोड दिइनुपर्छ’, उनले बताए ।
अन्तरक्रियाका सहभागीहरुले सिनेमाको बारेमा बेलाबखत बहससँगै, नयाँ प्रविधि, डिजिटल उपकरणको प्रयोगबारे कार्यशाला हुनुपर्ने बताए । दक्ष जनशक्ति भएमात्रै स्तरीय चलचित्र निर्माण गर्न सकिने उनीहरुको जोड थियो ।
अन्तरक्रियामा नेपाल चलचित्र तथा सांस्कृतिक प्रतिष्ठान एवं निफका अध्यक्ष केपी पाठक पनि सहभागी भएका थिए ।
प्रकाशित मितिः २०७८ मंसिर २६ आइतबार
Comments