काठमाडौं । कलाकार तथा कला लेखक देवेन्द्र थुम्केलीको जीवनीपरक कृति ‘कलाकार जीवनवृत्त’ सार्वजनिक भएको छ ।
आइतबार काठमाडौंको नक्सालस्थित नेपाल ललितकला प्रज्ञा प्रतिष्ठानमा आयोजित एक कार्यक्रममा प्रतिष्ठानका कुलपति केके कर्माचार्यले पुस्तकको विमोचन गरेका हुन् ।
कलाका बारेमा लेख्ने व्यक्ति निकै कम भएको कुलपति केके कर्माचार्यले बताए । ‘कलाकारका सिर्जनालाई दस्तावेजका रुपमा सग्रह गर्न प्रतिष्ठानले पुस्तक प्रकाशन गर्दै आएको छ’, कर्माचार्यले भने, ‘नेपाली कला र कलाकारलाई देश विदेशमा चिनाउनका लागि पनि कलालेखन, समीक्षा तथा कला पत्रकारिताको महत्त्व विशिष्ट छ ।’
प्रतिष्ठानका सदस्यसचिव घिमिरेले कला विषयका प्रकाशन जति धेरै गर्न सक्यो त्यो कला क्षेत्रकै लागि महत्त्वपूर्ण हुने धारणा राखे । समालोचक तेजविलास अधिकारीले पुस्तकमाथि टिप्पणी गर्दै नेपाली कला इतिहासलाई व्यवस्थित ढंगले लेख्नुपर्ने आवश्यकता रहेको धारणा व्यक्त गरे ।
२०१४ साल र २०३६ साल बीचमा जन्मिएका कलाकारको जीवनी चित्रण गरिएको पुस्तकमा १२ जना थाङ्का र पौभा कलाकारको जीवनीलाई समेटिएको छ । पुस्तकलाई नेपाल ललितकला प्रज्ञा प्रतिष्ठान, परम्परागत शिल्पकला विभागले प्रकाशन गरेको हो ।
प्रकाशित मितिः २०७८ साउन २५ सोमबार
Comments