बुटवल । बुटवलमा निर्माण हुन गइरहेको अन्तराष्ट्रियस्तरको प्रदर्शनी केन्द्रको शिलान्यास भएको छ ।
रामनगरस्थित बुटवल मण्डपको पश्चिमतर्फको ६ दशमलव ४ बिघा क्षेत्रफलमा प्रदर्शनी केन्द्र निर्माण हुन लागेको हो । शिलान्यासपछि आयोजित समारोहलाई सम्वोधन गर्दै नेपाल कम्युनिष्ट पार्टी नेकपाका महासचिव विष्णु पौडेलले तोकिएकै समयमा निर्माण सम्पन्न गर्ने गरी काम अगाडी बढाउन आयोजनालाई आग्रह गरे ।
अन्तर्राष्ट्रियस्तरको उच्च प्रविधीयुक्त यो प्रदर्शनी केन्द्र निर्माण पुरा गर्न २७ महिनाको समय अवधी सम्झौतामा तोकिएको छ । पौडेलले छेवैमा बन्दै गरेको अन्तराष्ट्रिय सम्मेलन केन्द्रको कामले चाहे जसरी गति लिन नसकेकोमा असन्तुष्टि ब्यक्त गर्दै तोकिएको समयमा निर्माण सम्पन्न नहुदा समस्याहरु थपिदै जाने बताए ।
उनले गुणस्तरीय निर्माणमा सम्झौता नगर्न आग्रह गर्दै नागरिक अनुगमनका लागि समेत स्थानीय समुदाय संघ संस्था र नागरिक समुदायलाई आग्रह गरे । पौडेलले बर्तमान सरकार समृद्धीको बाटोमा अगाडी बढेको बताउदै कुनै पनि आयोजनाहरुका लागि बजेट अभाव नहुने ब्यवस्था मिलाउन आफु सक्रियतापुर्वक लाग्ने बताए ।
विगतमा नेपाल अस्थिरताको चक्रब्युहबाट गुज्रेकाे बताउदै बर्तमान सरकार गठन भएपछि मुलुक स्थीर हुन लागेको कतिपयले पचाउन नसकेको बताए । पौडेलले बर्तमान सरकारको एउटै ध्येय समृद्ध नेपाल सुखी नेपाली बनाउने रहेको बताउदै समाजिक सुधार र समाजिक न्याय संगै आर्थिक विकासको गतिलाई तिब्रता दिने रहेको धारणा ब्यक्त गरे ।
शहरी विकास मन्त्रालयमार्फत निर्माण हुने यो प्रदर्शनी केन्द्र सरकारी स्तरको काठमाण्डौमा रहेको भृकुटीमण्डप पछिको ठूलो भएको दावी छ ।
बुटवल सभा हल तथा प्रदर्शनी केन्द्र निर्माण कार्यान्वयन इकाइ मार्फत निर्माण हुने उक्त प्रदर्शनी केन्द्र निर्माणको जिम्मा क्यापासिट इन्फ्रा प्रोजेक्ट्स–गौरी पार्वती जेभी कम्पनीले ठेक्का लिएको छ ।
प्रकाशित मितिः २०७६ जेठ १३ सोमबार
Comments