काठमाडौं । दिगो आर्थिक विकासका लागि आगामी कार्यदिशा पहिल्याउने उद्देश्यले ‘कान्तिपुर इकोनमिक समिट-२०२१ ’ सुरु भएको छ । काठमाडौंको सोल्टी क्राउन प्लाजामा बिहान साढे १० देखि सुरु भएको समिट साँझ साढे ५ बजेसम्म आयोजना हुने छ । समिटमा नेपाली अर्थतन्त्रसँग जोडिएका विभिन्न चार विषयमाथि वक्ताहरूले आफ्ना धारणा राख्नेछन् ।
उद्योगी, व्यवसायी, विज्ञ, सरकारी अधिकारी र राजनीतिज्ञहरूको सहभागिता रहने समिटमा राष्ट्रिय योजना आयोगका पूर्वउपाध्यक्ष एवं योजनाविद् पीताम्बर शर्माले मुख्य वक्ताका रूपमा नेपाली आर्थिक विकासका सम्भावना, चुनौती र यथार्थको सेरोफेरोमा रहेर सम्बोधन गर्नेछन् ।
पहिलो सत्रमा पूर्वाधार विकाससम्बन्धी मुद्दामाथि छलफल गरिनेछ । पूर्वाधार विकासको विद्यमान अवस्था, यसमा हुने ढिलाइ, ठूला परियोजना निर्माणमा देखापरेका अप्ठ्यारा, लगानीका सम्भाव्य स्रोतलगायत विषयमा चर्चा हुनेछ । उक्त सत्रमा योजना आयोगका पूर्वउपाध्यक्ष स्वर्णिम वाग्ले, प्रधानमन्त्रीका प्रमुख सल्लाहकार विष्णु रिमाल, पूर्वअर्थसचिव रामेश्वर खनाल र उद्योग सचिव यामकुमारी खतिवडाले भाग लिने तय भएको छ ।
‘निजी क्षेत्रको मनोबल’ शीर्षकको दोस्रो सत्रमा निजी क्षेत्रले भोगिरहेका समस्या र सरकारको भूमिकाका सम्बन्धमा छलफल हुनेछ । त्यसमा पूर्वअर्थमन्त्री तथा सत्तारूढ नेकपाका महासचिव विष्णु पौडेल, उद्योगी एवं सांसद विनोद चौधरी, राजस्व सचिव शिशिर ढुंगाना र नेपाल–भारत उद्योग वाणिज्य संघकी अध्यक्ष सिर्जना राणा सहभागी हुनेछन् ।
‘वित्तीय क्षेत्र– नियमन कि नियन्त्रण रु’ शीर्षकको तेस्रो सत्रमा राष्ट्र बैंकका गभर्नर चिरञ्जीवी नेपाल, बैंकर्स एसोसिएसनका अध्यक्ष भुवन दाहाल, मेगा र प्रभु बैंकका प्रमुख कार्यकारी अधिकृतहरू अनुपमा खुन्जेली र अशोक शेरचनले भाग लिनेछन् ।
नेपाली अर्थतन्त्र स् आजको अवस्था र भोलिको दिशा’ शीर्षकमा नेपाली अर्थतन्त्रले भोगिरहेका चुनौती, वर्तमान सूचक र आगामी रणनीतिका विषयमा छलफल हुनेछ । उक्त सत्रमा अर्थमन्त्री युवराज खतिवडा, पूर्वअर्थमन्त्रीहरू रामशरण महत र प्रकाशचन्द्र लोहनी तथा नेपाल उद्योग वाणिज्य महासंघकी अध्यक्ष भवानी राणा सहभागी हुनेछन् । अर्थशास्त्री विश्व पौडेलले उक्त सत्रको सहजीकरण गर्नेछन् ।
प्रकाशित मितिः २०७८ साउन ३१ आइतबार
Comments