पोखरा। भारोत्तोलन खेलाडी कमलबहादुर अधिकारीले आइतबार सन्यास लिने भएका छन् । आइतबार मध्याह्न १२ बजे भारोत्तोलनबाट आफूले सन्यासको घोषणा गर्न लागेको अधिकारीले बताए ।
२००६ को सागमा स्वर्ण जितेका ४२ वर्षे अधिकारीले १३ औं सागमा भने काश्य पदक जितेका थिए । काश्य पदक लिएलगत्तै सन्यासको घोषणा गर्ने उनको तयारी थियो । त्यतिबेला आयोजकको आग्रहमा उनले सन्यासको घोषणा गरेनन् ।
पोखरा माटेपानीस्थित केसी क्याटरिङमा भइरहेको भारोत्तोलन अन्तर्गतका सबै खेल आइतबार सकिँदैछन् र, खेल समापनसँगै उनले पनि सन्यासको घोषणा गर्ने भएका छन् । भारोत्तोलनमा नेपाललाई स्वर्ण दिलाउने कमल एक्ला खेलाडी हुन् । २०१० मा उनको प्रदर्शन खराब रह्यो भने २०१६ को १२ औं सागमा उनले भाग लिएका थिएनन् ।
नेपालमा जारी १३ औं सागको उदघाटन समारोहमा नेपाली खेलाडीहरुको नेतृत्व गर्दै कमलबहादुरले नेपालको राष्ट्रिय झण्डा बोकेका थिए ।नेपाल ओलम्पिक कमिटीले अन्तर्राष्ट्रिय अनुभव, पदक र ओलम्पिक सहभागिताका आधारमा कमललाई झण्डा बोक्न दिने निर्णय गरेको थियो ।
प्रकाशित मितिः २०७६ मंसिर २२ आइतबार
Comments