काठमाडौं । अलराउन्डर सम्झना खड्काको अलराउन्ड प्रदर्शनमा सुदूरपश्चिम प्रदेश काठमाडौंमा जारी दोस्रो संस्करणको ललितपुर मेयर वुमन्स च्याम्पियनसिप टि२० प्रतियोगिता फाइनलमा पुगेको छ ।
सुदूरपश्चिमले आफ्नो लिगको अन्तिम खेलमा लुम्बिनी प्रदेशलाई ३८ रनले हराउँदै शीर्ष दुईमा स्थान पक्का गर्दै फाइनलमा पुगेको हो । १ सय २९ रनको विजयी लक्ष्य पछ्याएको लुम्बिनीले निर्धारित २० ओभरमा ५ विकेट गुमाउँदै ९० रन बनायो । लुम्बिनीकी नेरी थापाले ३८ बलमा २ चौकासहित सर्वाधिक २३ रन बनाइन् । ओपनर आस्मा पुलामी मगर ३३ बलमा २ चौकासहित २२ रनमा आउट भइन् ।
लक्ष्मी चौधरी १०, कप्तान सरस्वती जिएम १ र सरस्वती पुन ४ रनमा आउट भइन् । नितु भण्डारी ७ र मधु डिसी ८ रनमा अविजित रहे ।सुदूरपश्चिकी तीव्र गतिकी बलर कविता कुँवरले ४ ओभरमा १ मेडनसहित २० रन खर्चेर २ विकेट लिइन् । स्पिनर सम्झना खड्काले ३ ओभरमा १३ रन खर्चेर २ विकेट लिइन् ।
त्यसअघि टियु क्रिकेट मैदानमा टस जितेर पहिला ब्याटिङ थालेको सुदूरपश्चिमले निर्धारित २० ओभरमा ५ विकेट गुमाउँदै १ सय २८ रन बनाएको थियो । सुदूरकी सम्झना खड्काले ४८ बलमा ५ चौकासहित सर्वाधिक ४२ रन बनाइन् । ऋतु कनोजिया ३४ बलमा ४ चौकासहित ३३ रन बनाइन् । तल्लोक्रमकी कविता जोशीले २४ बलमा ३ चौका र १ छक्कासहित ३२ रनमा आउट भइन् । कविता कुँवरले १० रन जोडिन् ।
लुम्बिनीकी नेरी थापाले ४ ओभरमा ३० रन खर्चेर ३ विकेट लिइन् । कृतिका मरासिनी र मधु डिसीले १–१ विकेट लिए । फाइनल सोमबार हुनेछ । एपिएफ ३ खेलमा ३ मा नै जितका साथ फाइनलमा पुगि सकेको छ । आइतबार लिगका अन्तिम खेल हुनेछन् । प्रदेश एक र ललितपुर मेयर्स–११ तथा दोस्रो खेलमा लुम्बिनी र एपिएफबीच प्रतिस्पर्धा हुनेछ । ललितपुर महानगरपालिकाको आर्थिक सहयोगमा क्यानले यस प्रतियोगिता आयोजना गरेको हो ।
प्रकाशित मितिः २०७८ फागुन १४ शनिबार
Comments