बार्सिलोना र रियल मड्रिडले खेले बराबरी

एजेन्सी, १९ मंसिर । स्पेनिस ला लिगा अन्तर्गत यो सिजनको पहिलो इएल क्लासिकोमा बार्सिलोना र रियल मड्रिडले एक एक गोलको बराबरी खेलेका छन । बार्सिलोनाको मैदान नाउ क्याम्पमा गएराति भएको खेलमा लिग लिडर रियल मड्रिडले बार्सिलोनालाई एक एकको बराबरीमा रोकेको हो ।
पहिलो हाफमा गोलरहित बराबरी भएको खेलमा ५३ औं मिनेमा नेइमारको फ्रि किकलाई लुइस स्वारेजले हेड मार्फत सुन्दर गोल गर्दै बार्सिलोनालाई सुरुवाति अग्रता दिलाए । खेलको अन्तिम समयसम्म बार्सिलोनाले रियल मड्रिडलाई गोल गर्न रोकेपनि ९० औं मिनेटमा कप्तान सर्जियो रामोसले गोल गर्दै खेल बराबरीमा टुग्याए । तनावग्रस्त देखिएको खेलमा बार्सिलोनाका नेइमारसहित ६ खेलाडीले पहेँलो कार्ड पाएका थिए । नेइमार आउँदो शनिबार हुने ओसासुनासँगको खेलमा खेल्न पाउने छैनन ।
बराबरीपछि लिग लिडर रियल मड्रिडले बार्सिलोनासँग ६ अंकको दूरी कायम राखेको छ । रियलको १४ खेलबाट ३४ तथा दोस्रो स्थानको बार्सिलोनाको समान १४ खेलबाट २८ अंक छ । बार्सिलोना लिगका पछिल्ला तीन खेलमा जित बिहीन छ ।
ला लिगा अन्तर्गत राति भएका अरु खेलमा एथ्लेटिको मड्रिड स्पानियोलसँग तथा भिल्लारियल लेगानेससँग गोलरहित बराबरी खेले भने ग्रानाडाले सेभिल्लालाई दुई एकले हराएको छ ।