भक्तपुर । भक्तपुर नगरपालिकाद्वारा सञ्चालित ख्वप कलेजले उत्कृष्ट नतिजा निकाल्दै आएको छ । देशभरका जिल्ला समन्वय समिति, नगरपालिका र गाउँंपालिकाहरुमध्येका स्थानीय निकायहरुमध्ये भक्तपुर नगरपालिकाबाट सञ्चालित देशकै पहिलो अनि एउटै कलेज ख्वपले प्रत्येक वर्ष देशभरकै कलेजहरुमध्ये उत्कृष्ट नतिजा निकाल्न सफल भएको हो ।
कलेजले दिएको जानकारी अनुसार कलेजका विद्यार्थी दुई पटक गोल्ड मेडलिष्ट भएका छन् । २०६८ सालमा एमवीएसमा सन्तोषी रिमाल र २०७२ सालमा एमवीएमै अभिषेश खनाल गोल्ड मेडलिष्ट हुन सफल भएका थिए । कलेजका प्रिन्सिपल रुपक जोशीले दक्ष, अनुभबी अनि मेहनती प्राध्यापक अनि सामूहिक प्रयासले यो सफलता मिलेको बताए । यही कारण कलेजमा काठमाडौंबाट पनि भक्तपुरसम्म आई विद्यार्थी पढ्न आउने उनले बताए । साथै कलेजमा झण्डै देशभरबाट विद्यार्थीहरु अध्ययनरत रहेको उनले बताए ।
कलेजमा विज्ञान, व्यवस्थापन र मानविकीमा स्नातकोतर तहसम्म पढाई भइरहेका छन् । तीन वटै संकायमा स्नातकोतर तहसम्म अध्ययन अध्यापन हुने यो भक्तपुरकै एउटै मात्रै कलेज रहेको बताइन्छ । साथसाथै भक्तपुर नगरपालिकाबाट नै सञ्चालित शारदा क्याम्पसमा शिक्षा संकायतर्फ स्नातकोतरको पढाई भइरहेको छ । कलेजमा स्नातकोतर तहमा एमवीएस, एमए अग्रेजी, एमए इकोनोमिक्स, बीएस्सी इन्भारामेन्ट साइन्सको पढाई भइरहेको छ । साथै शारदा क्याम्पसमा पपुलेशन र नेपालीमा एमएडको पढाई भइरहेको छ ।
स्थानीय निकायबाट सञ्चालन हुने भएकाले कलेज व्यवस्थापन समितिको अध्यक्षमा स्वतः भक्तपुर नगरपालिकाको प्रमुख रहने व्यवस्था छ । साथै नगरपालिकाका उपप्रमुख, सम्वन्धित वडाको वडा अध्यक्ष, शिक्षाविद्लगायतका वोर्ड सदस्य रहने व्यवस्था छ ।
कलेज ५५ रोपनी क्षेत्रफलमा फैलिएको छ । कलेजमा काठमाडौं, बनेपा, धुलिखेल, पनौतीलगायतका जिल्लाका विभिन्न ठाउँंहरुका विद्यार्थीका लागि गाडी सुविधाको पनि व्यवस्था छ ।
प्रकाशित मितिः २०७६ माघ ७ मंगलबार
Comments