काठमाडौ, १० फागुन । प्रहरी प्रधान कार्यालयको विज्ञापन अनुसार लोकसेवा आयोगले कार्तिक २४ देखि २७ गतेसम्म लिएको प्रहरी ईन्सपेक्टरको लिखित परिक्षाको नतिजा अनियमित रुपमा प्रकाशन गरिएको पाइएको छ । प्रहरी प्रधान कार्यालयले लोकसेवा आयोगले पठाएको लिखित परीक्षाको नतिजालाई लुकाएर छुट्टै नतिजा प्रकाशन गरेपछि परीक्षामा सहभागी प्रतिस्पर्धीहरुले सर्वोच्च अदालतमा रिट दायर गरेका छन् । द्वारिकाधिश घिमिरे, सन्देशमणि सापकोटा र सरोज कार्कीले दायर गरेको रिट उपर सर्वोच्च अदालतले सुनुवाई सुरु गरेको छ । सर्वोच्चले बिहीबार विपक्षीहरुलाई छलफलका लागी बोलाएको छ ।
प्रहरी हेड्क्वार्टरले नेपालको संविधान जारी भएपछि २०७३ सालको प्रहरी निरीक्षक पदको लिखित परीक्षाको नतिजा बर्णानुक्रमअनुसार लोकसेवा आयोगले खामबन्दी पठाएको रिजल्ट आयोगकै लेटरप्याड र आधिकारिक हस्ताक्षरसहित प्रकाशन गरेको थियो । तर, यसपटक भने प्रहरी प्रधान कार्यालयले आफ्नो लेटरप्याड समेत प्रयोग नगरी कार्यालयको छाप मात्रै लगाएर प्रकाशन गरेको छ ।
सिनियर प्रहरी अधिकृतको लिखित परीक्षाको नतिजा प्रकाशन गरिएको सूचिमा प्रहरी प्रधान कार्यालयका आधिकारिक व्यक्तिले हस्ताक्षर समेत गरेका छैनन् । प्रारम्भिक स्वास्थ्य परीक्षण तथा शारीरिक तन्दुरुस्ती परीक्षामा सफल भएकाहरुलाई लोकसेवा आयोगले कार्तिक २४ देखी कार्तिक २७ सम्म लिखित परीक्षामा सामेल गरेको थियो ।
प्रहरी नियमावली अनुसार मेडिकल, फिजिकल, लिखित र मौखिक चरणको परीक्षाको नतिजा छुट्टाछुट्टै प्रकाशन गर्नुपर्छ । तर, गत कार्तिकमा लोकसेवा आयोगले लिएको लिखित परीक्षाको नतिजामा शारिरिक तन्दुरुस्तीमा प्राप्त अंक समेत जोडेर नतिजा प्रकाशन गरिएको छ । जुन प्रहरी नियमावलीको विपरित हो ।
प्रतिस्पर्धीका तर्फबाट सर्बोच्चमा दायर गरेको रिटमा भिआईपीका पिएसओ र प्रहरी महानिरीक्षक प्रकाश अर्यालले आफ्ना आफन्त र नातेदारलाई इन्सपेक्टर बनाउन ‘किर्ते नतिजा’ प्रकाशन गरेको आरोप लगाएका छन् । प्रहरी स्रोतका अनुसार पूर्व प्रहरी महानिरीक्षक उपेन्द्रकान्त अर्यालले समेत आफ्ना मान्छेलाई घुसाएका छन् ।
लोकसेवा आयोगले लिएको परीक्षाको रिजल्ट माघ २२ गते प्रहरी प्रधान कार्यालयले आफ्नो वेभसाईट मार्फत कार्यालयको छाप मात्रै लगाएर प्रकाशन गरेको थियो । यसरी सार्वजनिक गरिएको नतिजामा लिखीत तथा शारिरिक तन्दुरुस्ती समेतको अंकलाई जोडेर १०२ जना सफल उम्मेद्वार उल्लेख गर्दै फागुन २ गते बिस्तृत स्वास्थ्य परीक्षणको लागी सम्पर्क गर्न भनिएको छ । परीक्षार्थीहरुले लिखित परीक्षाको नतिजा प्रकाशित गर्दा मनोगत रुपमा रहने शारीरिक तन्दुरुस्तीको नतिजा समेतलाई समावेश गरी प्रकाशित गरेको भन्दै निस्पक्ष छानविनको माग गरेका छन् ।
Comments