काठमाडौं, २ साउन। पानीबाट फैलने रोग ८० प्रतिशत हुन्छ भन्ने विषयमा सरकार अनभिज्ञ छैन । तर, पनि उपत्यकामा खानेपानी बिक्रेताले गर्दै आएको लापरबाहीलाई रोक्न सरकारले खासै ठोस कदम चालेको देखिँदैन । सरकारकै कमजोरीको फाइदा उठाउँदै व्यापारीले उपभोक्ताको स्वास्थ्यमा गरेको खेलबाडका कारण वर्षे्नि हजारौँको संख्यामा मानिस झाडापखाला, आउँ, टाइफाइड, जन्डिस, निमोनियाजस्ता थुप्रै रोगको सिकार बन्दै छन् । उपत्यकामा खानेपानी प्रदूषित भएकै कारण जुनसुकै समय हरेक खालका नयाँ–नयाँ रोगको त्रास फैलने गरेको विशेषज्ञहरूको ठम्याई छ ।
हाल काठमाडौंमा वितरण भइरहेको पानीमा स्वास्थ्यमा प्रतिकूल असर पार्ने ब्याक्टेरिया ७० प्रतिशतभन्दा बढी फेला परेको डरलाग्दो तथ्यांक सार्वजनिक भइसकेको छ । उपत्यकाको पानीमा कोलिफर्म मिसावट भएकाले पानीलाई उमालेर पिउन सुझाव दिए । उनले धाराको पानी, ट्यांकरको पानी र जारकै पानीसमेत उमालेर पिउन चिकित्सकहरू सुझाव दिँदै आएका छन् । पानी प्रदूषित हुन सक्छ भन्ने जान्दाजान्दै पनि सतर्कता नअपनाइएमा सरुवा रोग फैलन सक्नेतर्फ दुईमत छैन । उपत्यकामा झाडापखालादेखि बर्डफ्लु, स्वाइनफ्लु, स्क्रप टाइपस, डेंगु मलेरियाजस्ता सरुवा रोगको जोखिम रहेको छ । किटजन्य, पक्षीजन्य तथा पशुजन्य रोगबाट जोगिन सतर्कता अपनाउनुपर्ने देखिन्छ । धारामा आउने पानी, ट्यांकरले ओसार्ने पानी मात्रै नभई जार र मिनिरल वाटरको रूपमा बोतलमा पाइने पानीमा समेत कोलिफर्म भेटिँदै आएको छ ।
अघिल्लो वर्ष ललितपुरमा खानेपानी परीक्षण गर्दा ८१ प्रतिशत पानी अशुद्ध भेटिएको थियो । यो वर्ष विगतको भन्दा बढी भेटिने सम्भावना रहेको स्वास्थ्यकर्मी बताउँछन् । गत वैशाखयता ट्यांकर, जार, धारा तथा बोतलको गरी ६० वटा नमुना पानी परीक्षण गरिएकोमा ३९ वटा नमुनामा कोलिफर्म भेटिएको थियो । यस्ता, जीवाणुले हैजाको महामारी फैलाउने निश्चित छ । गोदावरी, सुनाकोठी, बंगलामुखी लगायतका स्थानबाट पानीको नमुना संकलन गरी ल्याएर परीक्षण गरेको थियो । गत वर्ष बढ्दो सहरीकरणसँगै धारामा आएका र ट्यांकरमा ओसारिएका मात्रै नभई प्राकृतिक रूपमा उम्रिएका पानीसमेत प्रदूषित छ ।
Comments