काभ्रे । भूकम्पबाट क्षति पुगेका काभ्रेका विकट कर्णाली भनेर चिनिएको महाभारत गाउँपालिका भित्रका विद्यालयको पुननिर्माण अन्तिम चरणमा पुगेको छ ।जिल्लाको महाभारत गाउँपालिकाभित्र मात्र २०७२ सालमा गएको भूकम्पबाट ४९ विद्यालय पूर्ण क्षति भएको थियो । विद्यालयको पुननिर्माणसँगै हस्तान्तरण समेत गरिएको छ ।
महाभारत गाउँपालिकाभित्र पुननिर्माण भइरहेको विद्यालयको अनुगमन र निरीक्षणमा पछि विद्यालय निर्माणको चरण अन्तिम अवस्थामा पुगेको छ । भूकम्पले क्षति पुर्याएका महाभारत गाउँपालिकामा रहेको ४९ वटा विद्यालयमध्ये ४४ वटा विद्यालयको भवन निर्माणमध्ये ३२ विद्यालयको पुननिर्माण सकेर व्यवस्थापन समितिलाई हस्तान्तरण गरिएको जिल्ला आयोजना कार्यान्वयन इकाइका इञ्जिनियर सोभित श्रेष्ठले बताए ।
बाँकी विद्यालयको भवन निर्माणाधिन अवस्थामा रहेको र केहीको शिलान्यास भएर निर्माणकै चरणमा रहेको श्रेष्ठले अन्नपूर्ण आनलाइनलाई जानकारी दिए। निर्माणाधिन अवस्थामा रहेको विद्यालयमा वडा नं. ५ चार किल्लास्थित ग्रामोन्नती मावि, गौलेश्वरी आधारभूत विद्यालय वडा नं. ६ गोलटार, जनकल्याण आधारभूत विद्यालय वडा नं. ७, आजाद माध्यमिक विद्यालय मगरगाउँ वडा नं.६ र जनकल्याण माध्यमकि विद्यालय घर्तिछाप वडा नं. ८ रहेको छ । ति बिद्यालयहरु चाडै निर्माण सकेर हस्तान्तरण गरिने इन्जिनियर श्रेष्ठले बताए ।
यो आर्थिक वर्षमा गाउँपालिकाको वडा नं. १ स्थित गोकुले माविको चार कोठे भवन, वडा नं. ३ स्थित सानो पोखराको सिद्धेश्वर माविको चार कोठे भवन र वडा नं. ६ बनखु सल्लेनीमा रहेको जनमोहन माविको चार कोठे भवन गरी तीनवटा विद्यालय गाउँपालिका अध्यक्ष कान्छालाल जिम्बाद्वारा शिलान्यास गरी निर्माण सुरु भएको छ ।
भूकम्पबाट क्षति भएको विद्यालय निर्माणको अन्तिम चरणमा रहेको महाभारत गाउँपालिका अध्यक्ष कान्छालाल जिम्बले बताए । जिल्ला आयोजना कार्यान्वयन इकाइ(शिक्षा)का इञ्जिनियर सोभित श्रेष्ठले जिल्लामा दातृ निकायहरुबाट बोलपत्र आह्वानमार्फत, एनजीओरआईएनजिओ र विद्यालय व्यवस्थापन समितिबाट गरी तीन तरिकाबाट विद्यालय भवन पुनःनिर्माण भएकोमा अब विद्यालय व्यवस्थापन समितिमार्फत गर्ने कामहरु बाँकी रहेको बताए ।
बाँकी रहेको विद्यालयको पुन निर्माण यो वर्षभित्रै सकिने श्रेष्ठले बताए । अब विद्यालय भवन निर्माणको काम अन्तिम चरणमा रहेकाले केही विद्यालयमा शौचालय निर्माणको काम आगाडि बढाइरहेको श्रेष्ठले बताए।
प्रकाशित मितिः २०७६ माघ ०८ बुधबार
Comments