काठमाडौ ४ असार । अफगानिस्तान सरकारले गरेको युद्धबिरामको प्रयास असफल भएको छ । तालिवानले युद्ध विराम समाप्त भएको घोषणा गर्दै सरकारी सुरक्षाकर्मीहरुमाथि आक्रमण सुरु गरेको छ ।
ईदको अवसरमा घोषणा गरिएको युद्धविरामलाई अफगान राष्ट्रपति असरफ गनीले थप बढाउन तालिवानलाई अपिल गरेका थिए । तर, तालिवानका प्रवक्ता जबिहुल्लाह मुजाहिदले आइतबार रातिदेखि युद्धविराम समाप्त भएको र सरकारी सुरक्षाकर्मीविरुद्ध लडाइँ सुरु भएको घोषणा गरेका छन् ।
सरकार र तालिवान दुवै पक्षले ईदको अवसरमा घोषणा गरेको तीन दिनको युद्धविराम २० जुनमा समाप्त हुनेवाला थियो । ईदमा तालिवान लडाकु र सरकारी सुरक्षाकर्मीहरुले संयुक्तरुपमा शुभकामना साटासाट गरेर मनाएका थिए । अफगान सुरक्षाकर्मी र तालिवान विद्रोहीले एकअर्कालाई अंगालो हाल्दै शुभकामना आदान प्रदान गरेको दृष्य साच्चिकै दुर्लभ थियो ।
यसलाई सकारात्मक भन्दै राष्ट्रपति गनीले युद्धविरामको अवधि थप १० दिन बढाएको घोषणा गरेका थिए । उनले तालिवानलाई पनि युद्धविराम लम्बाउन अपिल गरेका थिए । स्थायी शान्तिको तर्फ कदम बढाउन सरकारले चाहेको बताउँदै राष्ट्रपति गनीले तालिवानलाई पनि सर्वसाधारण नागरिकलाई जस्तै सरकारी सेवा सुविधा दिइने बताएका थिए ।
तर, बीबीसीका अनुसार तालिवानले भनेको छ( युद्धविरामको अवधि लम्बाउने कुनै मनसाय छैन र सोमबार बिहानै सरकार नियन्त्रित क्षेत्र तोडिने छ । सोमबार अफगान मिडियाबाट प्राप्त जानकारी अनुसार हेलमन्ड र कान्धार प्रान्तमा तालिवानले अफगानिस्तानका सरकारी सुरक्षाकर्मीहरुमाथि आक्रमण सुरु गरिसकेको छ ।
सन् २००१ मा अमेरिकी नेतृत्वमा भएको आक्रमणमा तालिवान सत्ता गुमेपछि अफगानिस्तानमा पहिलो पटक ईदको दिन युद्धविराम भएको थियो । राष्ट्रपति गनी फेब्रुअरीमा विना सर्त शान्तिवार्ता गर्न पनि तयार भएका थिए । उनले भनेका थिए( यदि तालिवानले कानुनको सम्मान गरेमा उसलाई एक वैध राजनीतिक समूहको दर्जा दिइने छ । एजेन्सी ।
Comments