काठमाडौं । प्रधानमन्त्री केपी शर्मा ओलीले श्रीलंकाको प्रधानमन्त्री महिन्दा राजपक्षलाई संसदीय चुनावमा उनको पार्टीको विजयप्रति बधाई दिएका छन् ।
प्रधानमन्त्री ओलीले ट्वीटमा लेखेका छन्, ‘नेपाल सरकार, नेपाली जनता र नेपाल कम्युनिस्ट पार्टीको तर्फबाट श्रीलंकाको प्रधानमन्त्री महिन्दा राजपक्षलाई बधाई र आउँदो कार्यकालको शुभकामना ।’
श्रीलंकाको आम निर्वाचनमा राजपक्ष परिवारको श्रीलंका पीपुल्स पार्टी (एसएलपीपी) ले दुई-तिहाई बहुमतको साथमा जित प्राप्त गरेको छ । यस निर्वाचनको निर्णय पछि अब महिन्दा राजपक्ष प्रधानमन्त्री बनिरहने छन् ।
उक्त जीतलाई महिन्दा राजपक्षको राजनीतिमा पुनर्वाहालीको रुपमा पनि देखिएको छ । यसभन्दा पहिला दुई पटकसम्म निर्वाचन स्थगित गरिएको थियो ।
निर्वाचन आयोगद्वारा जारी अन्तिम परिणाम अनुसार दुई सय २५ सदस्यीय संसदमा एसएलपीपीले एक्लै एक सय ४५ सीट जितेको छ र सहयोगी दलसँग कुल एक सय ५० सीटमा आफ्नो जित दर्ता गरेको छ । यसप्रकार दुई(तिहाई बहुमत हासिल गरेको छ । श्रीलंकाको निर्वाचन आयोगका अनुसार पार्टीलाई ६८ लाख अर्थात् ५९.९ प्रतिशत मत प्राप्त भएको छ ।
प्रकाशित मितिः २०७७ साउन २३ शुक्रबार
Comments