काठमाडौं । नेपाल मजदुर किसान पार्टीका सांसद प्रेम सुवालले वर्तमान सरकारको कुनै औचित्य नभएको टिप्पणी गरेका छन्। आइतबार प्रतिनिधिसभा बैठकमा विशेष समय लिएर बोल्दै उनले सरकारले काठमाडाैँलाई नै नेपाल सम्झेकाे जिकिर गर्दै काठमाडाैँलाई नै नेपाल ठान्नेहरूबाट देशको विकास हुन नसक्ने बताएका हुन्।
उनले भने,’काठमाडौँमा देखिएको धुवा, धुलो, जाम र फोहोरको समस्या कुनै पनि प्रधानमन्त्रीले समाधान गर्न सक्नु भएन। यो समस्याको समाधान सरकारमा गएका राजनीतिक पार्टीहरूबाट कहिल्यै हुनेछैन। यो जनताको अभिमत हो। काठमाडौँलाई नै नेपाल ठान्नेहरुबाट देशको विकास हुन सक्दैन।’
यसका साथै उनले खराव ठेकेदार, मिटरव्याजीदेखि त्राहिमाम हुने, खराव उद्योगी, व्यापारी, मिसावट गर्ने कालाबजारी, तस्करदेखि डराएकाले सरकारको औचित्य नभएको बताए।
मिटरव्याजीले डेढ लाख ऋणको ८० लाख ब्याज असुलेको भएपनि वर्तमान सरकारले उनीहरुमाथि कारबाहीको कुनै पनि ठोस कदम चाल्न नसेकेकोमा उनले आक्रोश समेत व्यक्त गरे।
सांसद सुवालले सरकारमा गइसकेका राजनीतिक दलहरूको सरकारले काठमाडौँ उपत्यकामा देखिएको फोहोरमैला, धुवाधुलो र प्रदुषणको समस्या समाधान गर्न नसक्ने दाबी समेत गरे।
सांसद सुवालले सांसदहरुले नै कर्जा प्रवाहमा हालीमुहाली गरेको देखिएको आरोप लगाउँदै सो सम्बन्धमा तत्काल छानवीन गर्न पनि सरकारको गम्भिर ध्यानाकर्षण गराएका छन्।
प्रकाशित मितिः २०७९ साउन २९ आइतबार
Comments