काठमाडौं । नेपाली कांग्रेसका प्रभावशाली नेता प्रकाशमान सिंहले गठबन्धनभित्र रहेका केही दलको आन्तरिक व्यवस्थापनमा अलमल हुँदा मन्त्रिपरिषद विस्तारमा ढिलाइ भएको बताएका छन् ।
आज गणेशमान सिंहको २५ औँ स्मृतिम दिवसको अवसरमा गणेशमान सिंह फाउन्डेसनले शोभाभगवतिमा गरेको कार्यक्रममा उनले सो कुरा बताएका हुन् । उनले अब चाँडै सरकारले पूर्णता पाउने बताए ।
नेता सिंहले काँग्रेस नेतृत्वको सरकारले जनताको भावनाअनुसार काम गर्नेमा विश्वास रहेको बताए । कम्युनिस्टहरुको दुई तिहाईको सरकारले जनताको मर्म र भावनाअनुसार काम गर्न नसकेकै कारण गढबन्द बनाइएको बताए ।
नेता सिंहले पार्टीको १४ औं महाधिवेशनबाट नेपाली जनताको भावना बुझ्ने सक्षम नेतृत्व आउने बताए। उनले विवाद भएका जिल्लामा विधिविधान अनुसार समाधान गर्नुपर्ने बताए ।
‘पार्टीभित्र विवाद र अलोकतान्त्रिक गतिविधि बढीरहेको छ,’ उनले भने’, ‘महाधिवेशन निस्पक्ष तवरले गर्नुपर्दछ । विवाद भएका जिल्लामा विधिविधान अनुसार समधान गर्न सभापति लगायत सम्पूर्ण नेताहरु लाग्नुपर्दछ ।’
नेता सिंहले साझा उम्मेद्वारको सम्भावना अझै नसकिएको भन्दै त्यसका लागी निरन्तर छलफल भइरहेको जानकारी दिए । तर आफू सभापतिको उम्मद्वारबाट पछि नहट्ने उनले बताए ।
उनले सर्वोच्च नेता गणेशमान सिंहले नेपालको राजनीतिमा पुर्याएको योगदानको स्मरण गरेका थिए । जस्तोसुकै अप्ठयारो परिस्थितिमा पनि गणेशमान सिंहले नेपाली जनाताको सेवा गर्न नछोडेको बताए । काँग्रेस पार्टी मजबुत बनाउन गणेशमान सिंहको अमुल्य योगदान रहेको नेता सिंहको भनाइ थियो ।
कार्यक्रममा पूर्वमन्त्री राजेन्द्र कुमार केसी, कांग्रेस केन्द्रीय सदस्य सुरेन्द्र राज पाण्डे, किरण गिरि, कांग्रेस काठमाडौँ सभापति सबुझ बानियाँ लगायत नेता कार्यकर्ताहरुको उपस्थित रहेको थियो ।
प्रकाशित मितिः २०७८ असोज २ शनिबार
Comments