काठमाडौँ । विश्वभर डरलाग्दो रुपमा फैलिएको कोरोना भाइरसको असर नेपालमा पनि परेको छ । अहिलेसम्म कसैमा यसको संक्रमण नदेखिए पनि डब्लूएचओले नेपाल कोरोनाको उच्च जोखिममा रहेको बताएपछि हरेकको मनमा त्रास उत्पन्न भएको छ । यसको संक्रमणबाट बच्न सरकारले सार्वजनिक यातायात बन्द गर्नेदेखि अत्यावश्यक कामबाहेकका सेवा बन्द गर्ने निर्णय गरिसकेको छ ।
कोरोनाको जोखिम न्यूनिकरणका लागि सरकारले सिनेमा हलदेखि फिल्मको छायांकन र प्रदर्शन रोक्न निर्देशन दिएपछि वर्षभरी सुटिङमा व्यस्त हुने कलाकारहरु अहिले घरको चारकुनामा खुम्चिएर बस्न बाध्य भएका छन् । कति पुस्तक पढेर दिन विताइरहेका छन् भने कति फिल्म हेरेर दिन काटिरहेका छन् । फिल्मकर्मीहरुले सर्तकता अपनाउन पनि दर्शकहरुलाई आग्रह गरिरहेका छन् ।
बैशाखबाट नयाँ फिल्मको छायांकनमा व्यस्त हुने तयारीमा रहेकी अभिनेत्री रेखा थापा पनि कोरोनाको त्रासका कारण केही दिनयता घरबाट बाहिर निस्किएकी छैनन् । कोरोनाका कारण फिल्मको छायांकन नहुने भएपछि उनले अहिले सामाजिक सञ्जालमार्फत् दर्शकहरुलाई सावधानी अपनाएर घरमै रहन आग्रह गरिरहेकी छन् । उनले सरकारले गरेको निर्णयको पनि स्वागत गरेकी छन् ।
शनिवार उनले आफ्नो आधिकारिक फेसबुकमा लेखेकी छन्, ‘सावधान हौं, आतंकित नहौं । सरकारले गरेको अपिललाई मनन् गरेर अत्यावश्यक काम बाहेकमा घर बाहिर ननिस्कौं ।’ एक भिडियो सन्देशमा उनले सावधानी नै कोरोनाबाट बच्ने उचित उपाय रहेको बताएकी छन् । उनले कसैसँग हात नमिलाउन र अंकमाल नगर्न आग्रह गर्दै दुई हात जोडेर नमस्कार गर्न भनेकी छन् ।
प्रकाशित मितिः २०७६ चैत्र ९ आइतबार
Comments