काठमाडौँ । गएको बैशाख २० गतेबाट प्रदर्शन सुरु गरेको सुदन केसी निर्देशित फिल्म ‘दाल भात तरकारी’ ले शनिबार राजधानीका तीन सिंगल थिएटर गोपीकृष्ण, अष्टनारायण र गुण सिनेमामा प्रदर्शनको ५१ दिन मनाएको अवसरमा निर्माण टिमले प्राविधिकलाई बोनस र प्रमाण पत्र प्रदान गरेको छ । आइतबार राजधानीमा फिल्मको ५१ दिने सेलिब्रेशन कार्यक्रम आयोजना गरिएको थियो ।
मिश्रित प्रतिक्रियाका बाबजुद पनि नेपालबाटै लगानी उठाउन सफल फिल्मको सफलताको पार्टीमा कलाकार, हल सञ्चालक, वितरक र प्रायोजकहरुलाई पनि प्रमाण पत्र वितरण गरिएको थियो । वितरक कम्पनी एफडी कम्पनी र वि.के फिल्मस्ले संयुक्त रुपमा निर्देशक सुदन केसीलाई सम्मान पत्र हस्तान्तरण गरे । भने, गोपीकृष्ण मुभिजले फिल्मको टिमलाई सम्मान पत्र प्रदान गर्यो ।
फिल्मको ५१ दिने सफलताको कार्यक्रममा सबैभन्दा महँगो उपहार अभिनेत्री आँचल शर्माले पाइन् । उनलाई निर्माण टिमले आइफोनको लेटेस्ट भर्सन दिएको थियो । निर्माता किरण केसीले आँचलले फिल्मले ५१ दिन मनाएको खण्डमा आफूलाई आइफोन दिनुपर्ने भनेकाले प्रदान गरेको बताए । दाल भात तरकारी’ ले नेपालमा ६ करोडको व्यापार गरेको रिपोर्ट प्राप्त छ । मह सञ्चारको ब्यानरमा यो फिल्म बनेको हो ।
फिल्ममा हरिबंश आचार्य, निरुता सिंह, पुष्प खड्का, आँचल शर्मा, वर्षा राउत, शिशिर बाङ्देल, मोहितबंश आचार्यलगायतका कलाकारहरुको अभिनय छ । अमेरिका मोहले ग्रसित एक परिवारको कथामा फिल्म आधारित छ । फिल्मको ५१ दिने सेलिब्रेसन कार्यक्रममा भुवन केसी, करिश्मा मानन्धर, रमेश उप्रेती, निर्मल शर्मा, प्रदीप भट्टराईलगायतका फिल्मकर्मीहरुको उपस्थिति रहेको थियो ।
कार्यक्रममा बोल्दै निर्माता किरण केसीले फिल्मलाई मिलेको राम्रोरनराम्रो दुबैखाले प्रतिक्रियालाई आत्मसात् गरेको बताए । उनले भने ‘हामीले रंगमञ्चलाई फिल्मी शैलीमा ढाल्ने एउटा प्रयास गरेका थियौं । त्यसमा हामी केही प्रतिशत चुक्यौं । राम्रो नराम्रो दुबैखाले प्रतिक्रिया दिनुहुने दर्शकप्रति म नमन गर्न चाहन्छु । अर्को पटक अझ मेहनत गर्नेछौं ।’ चाँडै मह सञ्चारले नयाँ फिल्मको घोषणा गर्ने पनि उनले बताए ।
कलाकार हरिबंश आचार्य भने ‘दाल भात तरकारी’ लाई लिएर भएको आलोचनाको सम्पूर्ण जिम्मा आफूले लिने बताउँछन् । फिल्मको पटकथा र संवाद समेत आफैंले लेखेका उनी भन्छन्, ‘यसपटक ५१ प्रतिशत आलोचना र ४९ प्रतिशत खुसी मिलेको छ । यसको सम्पूर्ण जिम्मेवारी म लिन्छु । फिल्म बनाउनु भनेको जाँच दिनु सरह हो । कहिले पास भइन्छ त कहिले फेल । अर्को पटक अझ मेहनत र सच्चिएर काम गर्ने वाचा गर्दछु ।’
प्रकाशित मितिः २०७६ असार १० मंगलबार
Comments