काठमाडौं । फ्राईडे रिलिज अन्तर्गत यो साता चार चलचित्र रिलिज भएका छन् । यी चार चलचित्र फ्राइडे रिलिजको परम्परा धान्दै देशभर एकसाथ प्रदर्शनमा आएका हुन् । विशारद बस्नेत निर्देशित मिस्टर भर्जिन, प्रदिप श्रेष्ठको ब्ल्याक, रुपेश तामाङ निर्देशित जय शम्भु र लय संग्रौलाको १२ मासे हलमा प्रदर्शनमा आएका हुन् ।
मिस्टर भर्जिन
वोर्ल्ड वाइड फिल्म्स डिस्ट्रिव्यूसन प्रा।लि।को ब्यानरमा निर्माण भएको चलचित्र ‘मिस्टर भर्जिनलाई विशारद बस्नेतले निर्देशन गरेका हुन् । चलचित्रमा गौरव पहारी, विजय बराल, कमलमणि नेपाल, मरिश्का पोख्रेल, भोलाराज सापकोटा, रविन्द्र झा, सिर्जना सुब्बा लगायतका कलाकारको अभिनय रहेको छ ।
तीन युवाको यौन मनोविज्ञानको कथालाई लिएर निर्माण भएको मिस्टर भर्जिनमा खिलेन्द्र तिमल्सिना, प्रजापति सिवाकोटी, मुकेश रेग्मी र बिशारद बस्नेतको लगानी रहेको छ भने सह निर्मातामा सन्दिप उप्रेती रहेका छन् ।
चलचित्रमा महेश दवाडीको कथा, रामेश्वर कार्कीको छायाङ्कन, विक्रम स्वाँर, दीपक याम सिंहको कोरियोग्राफी ,सुरज पण्डित, श्रीकृष्ण बम मल्ल, बुलेट फ्लो, आधा सुर, आर जे, मिस्टर प्रिन्सको सङ्गीत र मिलन डी। काप्रीले सम्पादन रहेको छ । चलचित्रमा टेक्निकल हेडको रूपमा दशरथ गिरी रहेका छन् ।
ब्ल्याक
आश्मा फिल्मस्को ब्यानरमा निर्माण भएको चलचित्र ब्ल्याकलाई प्रदिप श्रेष्ठले निर्देशन गरेका हुन् । चलचित्रमा आकाश श्रेष्ठ, आँचल शर्मा, सुन्दर श्रेष्ठ, आयुष रिजाल, सुशिल श्रेत्री, धिरेन शाक्य, प्रिया रिजाल लगायतको मुख्य भूमिका रहेको छ ।
मौनता श्रेष्ठको कथामा बनेको चलचित्रका कार्यकारी निर्माता चेतनकुमार पाण्डे हुन् । चलचित्रमा रामशरण उप्रेतिको छायांकन, महेश खड्का र प्रदिप पौडेलको संगीत रहेको छ । बसन्त अधिकारी मुख्य सहायक निर्देशक रहेको चलचित्रमा नृत्य निर्देशन रामजी लामिछानेको रहेको छ ।
जय शम्भु
चलचित्र जय शम्भुलाई रुपेश तामाङले निर्देशन गरेका हुन् । चलचित्रमा अनुप विक्रम शाही, प्रशान्त ताम्राकार, बर्षा सिवाकोटी, रोशन महर्जन, करुणा पाण्डे, अनुपम श्रेष्ठ, बसन्त भट्ट, कालु राना लगायतका कलाकारहरुको अभिनय रहेको छ ।
चलचित्रका प्रस्तुतकर्ता दिनेश शाही हुन् । राजकुमार नगरकोटी र चक्र पाख्रिन कार्यकारी निर्माता रहेको जय शम्भु को निर्मातामा अरविन्द्र शाक्य हुन् । चलचित्र जय शम्भु हरि घले लामाको छायांकन, श्री श्रेष्ठको एक्सन, टंक बुढाथोकीको संगीत, वनिश शाहको सम्पादन, रामजी लामिछानेको नृत्य रहेको छ ।
१२ मासे
चलचित्र १२ मासेलाई लय संग्रैलाले निर्देशन गरेका हुन् । कमेडी जनराको चलचित्रमा जयकिशान बस्नेत, पुजना प्रधान, मरिचमान श्रेष्ठ बल्छी धुर्बे, पुरण थापा, सारदा गिरी, सोनीका बास्तोला, सबनम दाहाल, राधा श्रेष्ठ, प्रदिप पाठक नक्कली प्रचण्ड लगायतको अभिनय रहेको छ ।
चलचित्रमा प्रदिप पाठक नक्कली प्रचण्डको कथा र निर्माण रहेको छ । यस्तै बासु न्यौपानेको छायाँकन तथा अनन्त घिमिरेको सम्पादन रहेको छ ।
प्रकाशित मितिः २०७५ भदौ १ सुक्रबार
Comments