काठमाडौं । रियल मड्रिडका कप्तान सर्जियो रामोसले अर्जेन्टिनी स्टार लियोनल मेस्सीलाई बार्सिलोना छाड्ने अधिकार रहेको बताएका छन् ।
मेस्सीको भविष्य अनिश्चित भईरहेको समय स्पेनिस डिफेन्डर रामोसले मेस्सीले आफ्नो भविष्य रोज्नका लागि सम्मान आर्जन गरेको प्रतिक्रिया दिएका हुन् ।
मेस्सी र उनको कानुनी टिमका अनुसार अर्जेन्टिनी फरवार्डले पछिल्ला हप्ता एकतर्फी रुपमा अनुबन्धन रद्ध गरिदिएका छन् । ३३ बर्षिया फरवार्डले बार्सिलोनाका नयाँ प्रशिक्षक रोनाल्ड कोम्यानसंग समेत प्रशिक्षण सत्रमा भाग लिन अस्विकार गरेका छन् ।
बार्सिलोनाले मेस्सीको सम्झौतामा उल्लेखित सर्त गत जुनमा सकिएको बताएको छ । क्लबले मेस्सीको अनुबन्धन वैधानिक रहेको ठहर गर्दै अर्जेन्टिनी फरवार्डलाई लैजान ७ सय मिलियनको रिलिज क्लज तिर्नुपर्ने दाबी गर्दै आएको छ ।
‘मलाई लाग्छ, मेस्सीले आफ्नो भविष्य छनोट गर्नका लागि सम्मान आर्जन गरेका छन् ।’ यूईएफए नेसन्स लिगको खेल अघि रामोसले भने ।
‘मलाई थाहा छैन, उनले यसलाई कसरी अघि बढाईरहेका छन् । तर निश्चित रुपमा स्पेनिस फुटबलका लागि, बार्सिलोनाका लागि, हाम्रो लागि, हामी सबै सर्वश्रेष्ठ हुनका लागि जित चाहन्छौ । हामी चाहन्छौ उनी यही रहुन ।’ रामोसले थपे ।
मेस्सीका एजेन्ट समेत रहेका उनका पिता जर्ज मेस्सी बुधबार बार्सिलोना आए । उनले क्लबका अध्यक्ष जोसेप मारिया बर्टोमेउसंग भेट गरे । उनले अध्यक्षसंगको भेटमा आफ्नो छोराले क्लब छाड्ने मनसाय बनाएको उल्लेख गर्दै सहज बहिर्गमनको आग्रह गरे ।
यदी जारी विवाद अन्त्य भएको खण्डमा म्यान्चेष्टर सिटी मेस्सी अनुबन्धनका लागि निकै अघि देखिन्छ ।
‘लियोले स्पेनिस लिगलाई राम्रो बनाएका छन् । उनले आफ्नो टिमलाई राम्रो बनाएका छन् । उनले एल क्लासिकोमा आकर्षण भरेका छन् । हामी आफ्नो राम्रो गर्दै जित चाहन्छौ । उनी अर्कोतर्फ विश्वका उत्कृष्ट छन् ।’ रामोसले भने, ‘त्यहाँ धेरै जोड्न पर्ने कुरा छैन । उनले भविष्यको निर्णय लिने सम्मान आर्जन गरेका छन् । हेरौ चिज कसरी अघि बढ्छ ।’
मेस्सी क्लासिकोका सर्वाधिक गोलकर्ता हुन् । उनले सन् २००७ पछि २६ गोल रियल मड्रिडबिरुद्ध गरेका छन् । एजेन्सी
प्रकाशित मितिः २०७७ भदौ १९ शुुक्रबार
Comments