काठमाडौं। यूईएफए युरोपा लिग फुटबलको उपाधि भिडन्त आज शुक्रबार राति हुँदैछ । जर्मनीको कोलोग्नेमा हुने फाइनलमा भिड्दै छन्, सेभिया र इन्टर मिलान । स्पेनिस क्लब र इटालियन क्लबबीचको उपाधि भिडन्त नेपाली समय अनुसार राति १२:४५ बजे सुरु हुनेछ ।
रायनइनर्जीस्टाडियोनमा दुबै टिम उपाधि उचाल्ने लक्ष्यसहित मैदान उत्रने छन् । युरोपियन प्रतियोगितामा सेभिया र इन्टर पहिलो पटक भिड्न लागेका हुन् । त्यसैले दुई टोलिबीचको खेल रोमान्चक हुने अनुमान गरिएको छ ।
युरोपा लिगमा सेभिया सर्वाधिक सफल टिम हो । सेभियाले पाँच पटक युरोपा लिग जितिसकेको छ । शुक्रबार राति इन्टरलाई हराएर सेभिया अर्को उपाधि जित्न चाहन्छ । सेभियाले पछिल्लो पटक सन् २०१६ मा उपाधि जितेको थियो ।
सेभियाले यस सिजनको युरोपा लिगमा उत्कृष्ट प्रदर्शन समेत गरिरहेको छ । क्वाटरफाइनलमा उल्भ्सलाई हराएको सेभियाले सेमिफाइनलमा अर्को इंग्लिस क्लब म्यानचेस्टर युनाइटेडलाई २-१ ले हराएको थियो ।
तर, सेभियाका मुख्य प्रशिक्षक जुलेन लोपेटेगुइ इन्टर ठुलो टिम भएको र अघिल्ला खेल भन्दा फरक हुने बताउँछन् ।
बिल्कुल नयाँ र फरक टोली हो र हामी एक ठुलो टिमविरुद्ध खेल्दैछौ, जुलेनले भने, न्टर एक टोली हो जो च्याम्पियन्स लिगमा प्रतिस्पर्धा गर्न सक्षम छ । इन्टरसँग उत्कृष्ट खेलाडी छन् र
अनुभवी प्रशिक्षक छन् । म आशा गर्दछु कि उत्कृष्ट खेल हुनेछ । हामीले चुनौती पन्छाउन तयारी गरेका छौँ ।
एन्टोनियो कोन्टेको टिम इन्टर पनि युरोपा लिगको सर्वाधिक सफल टिम हो । इन्टरले अहिलेसम्म ३ पटक उपाधि जितिसकेको छ ।
तर, इन्टर लामो समयपछि युरोपा लिगको फाइनलमा पुगेको हो । इन्टर सन् १९९९ को सिजनपछि फाइनल पुग्ने पहिलो इटालियन टिम हो । इन्टरले पछिल्लो पटक १९९८ मा उपाधि जितेको थियो ।
इन्टरले पछिल्लो ९ वर्ष यता कुनैपनि उपाधि जित्न सकेको छैन । यस पटक भने सेभियालाई हराएर इन्टर लामो समयपछि उपाधि जित्ने दाउमा हुने छन् । तर, सेभियाविरुद्ध इन्टर सतर्क भएर खेल्नेछ ।
यो कठिन खेल हुनेछ । हामी सबै भन्दा धेरै अनुभवी टिमसँग खेल्दैछौं । जसले सबै भन्दा धेरै उपाधि जितेका छन्, कान्टेले भने, हामी सतर्क हुनुपर्दछ तर हामीले उत्साह र साहसका साथ आफ्नै खेल पनि खेल्नु पर्दछ जुन हामीले अहिलेसम्म गरेका थियौं ।
इन्टरले सेमिफाइनलमा युक्रेनी क्लब साख्तर डोनेस्कलाई ५-० ले हराएको थियो । त्यसअघि क्वाटरफाइनलमा जर्मन क्लब बायर लिवरकुसेनको चुनौती पन्छाएको थियो ।
खेलाडीको उत्कृष्ट लयको कारण पनि इन्टर थप उत्साहित छ । यस सिजन क्लबका लागि ३३ गोल गरिसकेका फरवार्ड रोमेरो लुकाकु इन्टरको मुख्य हतियार हुनेछन् ।
तर, चोटको कारण अर्क फरवार्ड एलेक्सिस सान्चेज भने फाइनल खेल्ने सम्भावना न्यून छ । सेभियाका फरवार्ड लुकास ओकाम्पोसले पनि फाइनल गुमाउन सक्ने बताईएको छ । उनी चोटबाट पूर्ण फिट भईसकेका छैनन् । एजेन्सी
प्रकाशित मितिः २०७७ भदौ ५ शुक्रबार
Comments