काठमाडौं । इंग्ल्यान्ड तथा म्यानचेस्टर युनाइटेडका लिजेण्ड डेभिड बेकह्यामले क्रिस्टियानो रोनाल्डो भन्दा लियोनल मेस्सी उत्कृष्ट खेलाडी भएको बताएका छन् ।
अर्जेन्टिनाको एक न्युज एजेन्सीसँग कुरा गर्दै बेकह्यामले मेस्सी अद्वितीय खेलाडी भएको बताउँदै उनको स्तरमा रोनाल्डो नभएको बताएका हुन् ।
‘मेस्सी एक्लो क्लासी खेलाडी हुन् । उहाँ जस्तो अर्को हुन असम्भव छ,’ बेकह्यामले भने, ‘क्रिस्टियानो उनको स्तरमा छैनन् । तर, बाँकीमा दुवै माथि छन् ।’
विश्व फुटबलमा पछिल्लो समय बार्सिलोनाका मेस्सी र युभेन्ट्सका रोनाल्डोबीच को उत्कृष्ट भन्ने विषयमा बहस हुँदै आइरहेको छ ।
तर, रियल मड्रिड तथा पीएसजीका पूर्व फरवार्ड बेकह्यामले भने मेस्सी सर्वोकृष्ट भएको बताएका हुन् ।
पछिल्लो १२ वर्षमा मेस्सी र रोनाल्डोले मात्र ११ पटक बालोन डी’ओर जितेका छन् । जसमा मेस्सीले कीर्तिमानी ६ र रोनाल्डोले ५ पटक जितेका छन् ।
बेकह्यामले रियलमा रहदा मेस्सीविरुद्ध प्रतिस्पर्धा गरेका थिए । फुटबलबाट सन्यासअघि पीएसजीबाट च्याम्पियन्स लिग जित्ने बेकह्यामको सपना मेस्सीको टिमले तुहाई दिएको थियो ।
सन् २०१२/१३ को सिजन क्वाटरफाइनलमा पीएसजी बार्सिलोनासँग पराजित भएको थियो ।
यस्तै बेकह्यामले मेस्सी मैदान छिरेपछि बार्सिलोनालाई हराउँन कठिन रहेको समेत बताए । ‘मेस्सी आउनुअघि हामी अग्रता बनाउने गर्थ्यौं । जब उनी आउथे बार्सिलोनाले गोल गर्थ्यो,’ बेकह्यामले भने । एजेन्सी
प्रकाशित मितिः २०७६ बैशाख ७ आइतबार
Comments