काठमाडौं । १३ औं दक्षिण एसियाली खेलकुद प्रतियोगिता (साग)को पुरस्कार रकम सरकारले सिधै खेलाडीको बैंक खातामा पठाउने भएको छ ।
फागुन १२ गते मन्त्रीपरिषदबाट संशोधित कार्यविधि अनुसार खेलाडीको पुरस्कार रकम सिधै बैंक खातामा जाने भएको हो ।
युवा तथा खेलकुद मन्त्रालय र राष्ट्रिय खेलकुद परिषद (राखेप)ले एक बिशेष कार्यक्रमको आयोजना गरेर प्रधानमन्त्री केपी ओलीको हातबाट पुरस्कार रकम हस्तान्तरणको योजना बनाएका थिए ।
तर विश्वमा फैलदो कोरोना भाईरस र प्रधामन्त्रीको स्वास्थ्य अवस्थालाई ध्यानमा राखेर सरकारले खेलाडीको रकम तत्काल बैंक खातामा पठाउने भएको हो ।
‘केही दिनमा पुरस्कार रकम खेलाडीको बैंक खातामा जान्छ ।’ राखेप उपाध्यक्ष पिताम्बर तिम्सिनाले खेलपाटीसंग भने, ‘रकम अर्थ मन्त्रालयबाट निकासा भएर आईसकेको छ । रकम यथाशिघ्र खातामा जान्छ, सम्मानको कार्यक्रम पछाडी हुन्छ ।’
उपाध्यक्ष तिम्सिनाले चाँडै पुरस्कार रकम दिने योजना भएपनि प्रक्रियाले गर्दा केही ढिलाई भएको बताए ।
‘प्रक्रियाले केही ढिलाई भयो । परिषद्, युवा तथा खेलकुद मन्त्रालय, अर्थ मन्त्रालय हुँदै मन्त्रीपरिषदबाट पारित हुन समय लाग्यो ।’ उनले बताए ।
खेलकुद मन्त्रालय र राखेपले फागुन महिना भित्र खेलाडीको पुरस्कार रकम दिने बताएका थिए ।
तर कोरोना भाईरसको प्रभाव घरेलु खेलकुदमा समेत देखिएको छ । सोही अनुसार मन्त्रालय र परिषद्ले अनिश्चितकालिन भिडभाड हुने खेलकुदका कार्यक्रम रोक्न निर्देशन जारी गरेको छ ।
पछिल्लो निर्देशनसंगै यसै महिनाभित्र खेलाडीलाई दिने भनिएको पुरस्कार रकममा समेत अन्यौलता बढेको थियो ।
कोरोनाका कारण अन्य कार्यक्रम स्थगित भएपनि पुरस्कार रकम भने खेलाडीको खातामा तत्काल राखिदिने राखेपको तयारी छ ।
‘विपतको अवस्था छ । भेला, कार्यक्रम नगर्ने सरकारको नीति छ । कार्यक्रम गरेर रकम हातमा हस्तान्तरण गर्ने अवस्था छैन ।’ तिम्सिनाले भने, ‘नागरिकता र एकाउन्ट संकलन गरिरहेका छौ । सोही आधारमा सम्बन्धित खेलाडीको बैंक एकाउन्टमा रकम पठाउँछौ ।’
गत मंसिरमा सम्पन्न सागको पुरस्कार रकम हस्तन्तरणमा सरकारले ढिलाई गर्दै आएको छ । साग सकिएको भोलीपल्टै (मंसिर २५) गते बालुवाटारमा कार्यक्रमको आयोजना गरेर प्रधानमन्त्री ओलीले पुरस्कार रकम घोषणा गरेका थिए ।
उनले व्यक्तिगत स्पर्धाका स्वर्ण पदक विजेतालाई ९ लाख, रजत जित्नेलाई ६ लाख र कास्य जित्नेलाई ३ लाख रुपैयाँ दिने घोषणा गरेको थियो । एक भन्दा बढी स्वर्ण जित्ने खेलाडीलाई ११ लाखका दरले पुरस्कार रकम दिने सरकारको घोषणा गरेको थियो ।
प्रधामन्त्रीले टिम ईभेन्ट्समा स्वर्ण जित्ने खेलाडीलाई ५ लाख दिने बताएपनि अन्य पुरस्कार रकमको घोषणा गरेका थिएनन् ।
तर संशोधित कार्यविधि अनुसार टिम ईभेन्ट्का स्वर्णधारी खेलाडीले ६ लाख पाउने भएका छन् । यस्तै, रजतले ४ र कास्य जित्नेले २ लाख रुपैया पाउने भएका छन् ।
कार्यविधिले सागका मुख्य प्रशिक्षक र सहयाक प्रशिक्षकको समेत पुरस्कार रकमको टुङ्गो लगाएको छ ।
स्वर्ण जिताउने मुख्य प्रशिक्षकलाई ५ लाख, रजतलाई ३ र कास्यलाई २ लाख रकम दिने सरकारले निर्णय लिएको छ । यस्तै, सहायक प्रशिक्षकमा स्वर्ण विजेतालाई ३ लाख, रजतलाई २ लाख र कास्यलाई १ लाख दिने कार्यविधिमा उल्लेख छ ।
प्रकाशित मितिः२०७६ फागुन २४ शनिबार
Comments