काठमाडौं । स्पेनिस फुटबल प्रतियोगिता कोपा डेल रेमा सेमिफाइनलको समिकरण टुंगो लागेको छ । गए राति भएको क्वार्टरफाइनलको दोस्रो लेगबाट रियल मड्रिडले जित निकाल्दै अन्तिम चारमा प्रवेश गरेपछि सेमिफाइनल पुग्ने टोलीहरुको टुंगो लागेको हो ।
रियल मड्रिडले गए रातिको खेलमा जिरोनालाई ३–१ गोल अन्तरले र समग्रमा ७–३ ले हराउँदै सेमिफाइनलमा प्रवेश गरेको हो । जिरोनाको घरेलु मैदानमा भएको सो खेलमा रियललाई जिताउन करिम बेन्जेमाले दुई तथा मार्कोस लोरेन्टले एक गोल गरे । यता जिरोनका पेड्रो पेर्रोले एक गोल फर्काए ।
रियलका लागि करिमले खेलको २७ औं मिनेटमा र ४३ औं मिनेटमा गोल गर्दै पहिलो हाफ २–० को अग्रता दिलाए । दोस्रो हाफमा जिरोनाका पेड्रोले गोल गर्दै खेल फर्काउन खोजे । उनले खेलको ७१ औं मिनेटमा गोल गर्दै जिरोनालाई २–१ को स्थितिमा ल्याए ।
तर, खेलको ७६ औं मिनेटमा रियलका लागि मार्कोसले गोल गर्दै रियललाई सेमिफाइनलमा पुर्याए । यस अघिको क्वाटरफाइनलको पहिलो लेगमा रियलले आफ्नै मैदानमा जिरोनाविरुद्ध ४–२ को जित निकालेको थियो । यसकारण पनि रियलले समग्रमा ७–३ ले जित निकाल्न सफल भयो ।
यस खेलपछि यस प्रतियोगिताको सेमिफाइनल पुग्ने चार टोलीको टुंगो लागेको छ । यसअघि भ्यालेन्सिया, रियल बेटिस र बार्सिलोना सेमिफाइनल प्रवेश गरिसकेका छन् । एजेन्सी
प्रकाशित मितिः २०७५ माघ १८ शुक्रबार
Comments