काठमाडौं । लिगको ११औं हप्ताको खेलमा दोस्रो स्थानको अलाभेस एइबारसँग पराजित भएको छ । यो हारसँगै उसले दोस्रो स्थान गुमाएर चौथो स्थानमा झरेको छ । गत राति एइबारको घरेलु मैदानमा भएको खेलमा अलाभेस २–१ ले पराजित भयो । यो हारबाट अलाभेसलई घाटा भएको छ । यदि उसले जित वा बराबरी मात्रै गर्न सकेको भए पनि ऊ बार्सिलोनापछि दोस्रो स्थानमा रहन्थ्यो ।
अवे मैदानमा भएको खेलमा चौथो मिनेटमै अलाभेसले जोनी रोड्रिगेजको गोलबाट अग्रता लिए पनि त्यसलाई जोगाउन सकेन । खेलको ६९औं मिनेटमा घरेलु टोली एइबारका लगि जोन जोर्डनले बराबरी फर्काए । अन्तिम समय सम्हालिन नसक्दा अलाभेसले दोस्रो गोल खायो । ९० मिनेटपछि थपिएको समयमा एइबारका लागि पापाकोउलीले गोल गर्दै टोलीलाई कमब्याक जित दिलाए ।
केही तनावपूर्ण खेलमा दुवै टोलीका १–१ जना खेलाडीले रातो कार्ड खाँदै बाहिरिएका थिए । २४औं मिनेटमा अलाभेसले रुबेनलाई गुमायो भने ६२औं मिनेटमा एइबारले पाब्लोलाई गुमाएको थियो । यो हारपछि अलाभेस २० अंकसहित लिगको चौथो स्थानमा घटुवा हुँदा एइबार भने १४ अंकसहित १२औं स्थानमा उक्लिएको छ ।
प्रकाशित मितिः २०७५ कार्तिक १९ सोमबार
Comments