काठमाडौं ७ असार । विश्वकपमा २० वर्षपछि उत्कृष्ट सुरुवात गरेको क्रेएशिया आज अर्जेन्टिनाबिरुद्धको भिडन्तमा पक्कै पनि अर्जेन्टिनाभन्दा कम दबाबमा उत्रनेछ । संयोग नै मान्नुपर्छ, सन् १९९८ मा आफ्नो पहिलो विश्वकप यात्रा थालनी गर्दा क्रेएशियाले समूह चरणमा अर्जेन्टिनासँग नै प्रतिस्पर्धा गरेको थियो र उक्त खेलमा १–० ले पराजित भएको थियो ।
उक्त विश्वकपमा सेमिफाइनल पुगेर क्रेएशियाले तेस्रो स्थान हासिल गर्दा अर्जेन्टिनाको यात्रा अन्तिम–१६ मै टुंगिएको थियो । त्यसपछि मैत्रिपूर्ण खेलमा एक–अर्काविरुद्ध प्रतिस्पर्धा गरे पनि विश्वकपमा यी दुई टोली भिडेका छैनन् । यसपटक विश्वकपमा अर्जेन्टिनालाई बलियो आँकिएको थियो भने क्रेएशियालाई कमजोर । तर, अर्जेन्टिनालाई पहिलो खेलमा आईसल्यान्डले एक–एक गोलको बराबरीमा रोकेको छ । यता, क्रेएशियाले आफ्नो पहिलो खेलमा नाइजेरियालाई २–० ले हराएको छ । त्यसैले स्पष्ट छ, अर्जेन्टिना जित चाहन्छ । क्रेएशियाका लागि बराबरी नतिजा पनि जित सरह नै हुनेछ ।
नाइजेरियाविरुद्धको खेलपछि प्रतिक्रिया दिँदै क्रेएशियाका मारियो मान्डजुकिकले फ्रान्समा सन् १९९८ मा गरेको प्रदर्शनभन्दा उत्कृष्ट खेल्ने लक्ष्य टोलीको रहेको बताएका थिए । उनले घुमाउरो भाषामा फाइनल खेल्ने लक्ष्य रहेको बताएका हुन् । त्यसका लागि अर्जेन्टिना विरुद्ध सोचेजस्तो नतिजा निकाल्न जरुरी छ । लियोनल मेस्सीलाई रोक्न क्रेएशियालाई सहज छैन । अर्जेन्टिनी प्रशिक्षक सम्पाओलीले टोलीमा धेरै परिवर्तन गर्दैछन् । रणनीतिक रुपमा र खेलाडीमा पनि । यसले क्रेएशियालाई थप गाह्रो पार्नेछ किनकी अर्जेन्टिनाको बेञ्चमा पनि उत्कृष्ट खेलाडीहरु छन् ।
अर्जेन्टिनाले विश्वकपमा ९० मिनेटभित्र जित निकाल्न नसकेको ३ खेल भइसकेको छ । सन् २०१४ को विश्वकप क्वाटरफाइनलमा बेल्जियमलाई १–० ले हराएको अर्जेन्टिनलो सेमिफाइनलमा नेदरल्यान्डसँग गोलरहित बराबरी खेलेको थियो । त्यसपछि टाइब्रेकरमा जित निकालेको अर्जेन्टिना फाइनलमा जर्मनीसँग पराजित भयो । यस संस्करणमा पहिलो खेलमै आइसल्यान्डसँग पराजित भएको अर्जेन्टिनाले क्रेएशिया विरुद्ध जित निकाल्नका लागि सबै ताकत लगाउनेछ । कप्तान लियोनल मेस्सीले स्वभाविक खेल खेल्नसके अर्जेन्टिनालाई त्यति गाह्रो नहोला । टोलीमा रहेका सर्जियो अगुएरो, गोन्जालो हिग्वाइन, जाभियर मास्चेरानो लगायतका खेलाडीले पनि उत्कृष्ट खेल्न जरुरी छ ।
प्लेयर टु वाच
क्रिष्ट्रियन पाभोन
पहिलो खेलमा एन्जेल डि मारियाको स्थानमा वैकल्पिक खेलाडीका रुपमा क्रिष्ट्रियन पाभोनले मैदान प्रवेश गरेका थिए । उनले उत्कृष्ट खेले । त्यसैले आजको खेलमा उनी सम्भावित एघारमा पर्ने सम्भावना धेरै छ । बोका जुनियर्सबाट खेल्ने यी खेलाडी दायाँ र बायाँ दुबैतर्फबाट खेल्न सक्छन् । त्यसैले उनी मेस्सीका लागि राम्रो पार्टनर हुनसक्छन् ।
बोका जुनियर्सबाट ६५ खेल खेल्दै १७ गोल गरेका यी विंगरले अर्जेन्टिनाबाट कमै खेल खेलेका छन् । तर, जति पनि खेल खेलेका छन् । सबै खेलमा आफुलाई प्रमाणित गरेका छन् । ५ खेल खेलेका यी विङ्गरले विश्वकपअघि रुस विरुद्धको आफ्नो डेब्यु खेलमै सर्र्जियो अगुएरोलाई गोलका लागि एसिस्ट गरेका थिए । लगत्तै, नाइजेरियाविरुद्ध पनि उनले गोलका लागि अवसर सिर्जना गरे । पाभोन आफ्नो पहिलो अन्तर्राष्ट्रिय गोलको व्यग्र प्रतिक्षामा छन् ।
लुका मोड्रिच
धेरैले मेस्सीको चर्चा गर्दा मोड्रिचको नाम बिर्सन्छन् । तर, पछिल्लो समय उनले जे–जस्तो खेलेका छन् । त्यो आफैमा उदाहरणीय छ । मोड्रिचले नाइजेरिया विरुद्धको खेलमा पेनाल्टीमार्फत गोल त गरे नै, आफ्नो टोलीको दबदबा कायम राख्ने क्रममा मिडफिल्डमा पनि उत्कृष्ट खेले ।
३२ वर्षका यी स्टारले १ सय ७ अन्तर्राष्ट्रिय खेल खेल्दै ३२ गोल गरेका छन् । संयोगवस्, उनले अर्जेन्टिना विरुद्धको मैत्रिपूर्ण खेलमार्फत नै क्रेएशियाको टोलीमा डेब्यु गरेका थिए र उक्त खेल क्रेएशियाले ३–२ ले जितेको थियो । क्लब फुटबलमा मोड्रिचको प्रदर्शन जबर्जस्त छ । रियल म्याड्रिडलाई चार पटक च्याम्पियन्स लिग जिताउने क्रममा उनले महत्वपूर्ण भूमिका खेलेका छन् ।
छोटो र लामो दुरीमा क्रस उपलब्ध गराउन उनी खप्पिस छन् । अहिलेको उत्कृष्ट क्रिएटिभ मिडफिल्डर मध्ये एक हुन् उनी । सबैभन्दा महत्वपूर्ण पक्ष उनी दुबै खुट्टाले उत्तिकै उत्कृष्ट प्रहार गर्न सक्छन् । कुनै पनि समय खेलमा परिवर्तन ल्याउन सक्छन् । एजेन्सी ।
Comments