एजेन्सी, २५ असोज । कोपा अमेरिका विजेता चिली आगामी वर्ष रुसमा हुने विश्वकप फुटबलका लागि छनौट हुन सकेन । दक्षिण अमेरिकी क्षेत्रको छनौट अन्तर्गत आज बिहान भएको खेलमा ब्राजिलसँग ३–० ले पराजित भएसँगै विश्वकपका लागि छनौट हुन नसकेको हो ।
ब्राजिलका लागि पाउलिन्होले एक तथा गाब्रियल जिससले दुई गोल गरे । चिलीलाई कम्तिमा प्ले–अफमा स्थान बनाउनका लागि एक गोल अन्तरको हार चाहिन्थ्यो । चिलीका एलेक्स सान्चेज, अटुसो भिडालसहितका खेलाडीले गोल गर्ने प्रयास गरेका थिए । तर सफल भने हुन सकेनन् ।
कोलम्बियासँग १–१ को बराबरी खेलेको पेरु गोल अन्तरमा अघि रहँदै पाँचौं स्थानमा रहेर प्ले–अफमा स्थान बनाउन सफल भयो । पेरु र चिलीको समान २६ अंक भएपनि गोल अन्तरमा पेरु अघि रहेपछि चिलीको विश्वकप खेल्ने सपना टुट्यो ।
कोपा अमेरिका विजेता चिलीको विश्वकप खेल्ने सपना अधुरै रह्यो
0
Share.
Comments