काठमाडौं । २७ वर्षअघि देखि हत्या अभियोगमा जेल सजाय भोगिरहेका एक व्यक्तिले सफाई पाएका छन् । चीनको एक अदालतले जाङ युख्यानलाई दोषी प्रमाणित गर्न प्रयाप्त प्रमाण नपुगेको भन्दै मंगलबार रिहा गरेको हो ।
सन् १९९३ मा दुई युवाको हत्या गरेको आरोपमा प्रहरीले जाङलाई पक्राउ गरेको थियो । जीयाङ्सी प्रान्तस्थित जेलमा ९,७७८ दिन काटेका उनी चीनमा विनाअपराध सबैभन्दा लामो समयसम्म थुनामा परेका व्यक्ति हुन् ।
सन् १९९५ को ज्यानुअरीमा जियाङ्सी प्रान्तको राजधानी नान्चाङ्गस्थित एउटा अदालतले उनलाई दोषी ठहर गर्दै मृत्युदण्डको फैसला सुनाएको थियो । तर उनले दुई वर्ष सजाय काटेपछि भने उक्त फैसलालाई आजीवन कारावासमा परिणत गर्न अनुमति दिएको थियो ।
जाङका अनुसार प्रहरीले उनलाई सोधपुछका क्रममा आफुले अपराध गरेको स्वीकार गर्न यातना दिने गर्थे । तर उनले अदालतमा निरन्तर आफू निर्दोष बताउँदै आएका थिए ।
सन् २०१९ को मार्च महिनामा उच्च अदालतमा उक्त मुद्दा फेरि हेर्न सहमत भयो र जुलाईमा प्रान्तीय अभियोजनकर्ताहरूले प्रमाणको कमीका आधारमा उनलाई रिहा गर्न सिफारिस गरेका थिए । सन् १९९३ मा मारिएका दुई युवाका हत्यारा भने हालसम्म पत्ता लाग्न सकेको छैन ।
प्रकाशित मितिः २०७७ साउन २२ बिहिबार
Comments