काठमाडौं । चलचित्र ‘ज्याकी: आई एम ट्वान्टी वान’ को पोस्टरमा अभिनेत्री जसिता गुरुङको फस्ट लुक सार्वजनिक भएको छ ।
आगामी बैशाख २१ गतेबाट प्रदर्शनमा आउन लागेको डान्स ड्रामा चलचित्रमा अभिनेता धिरज मगर र जसिताको मुख्य भूमिका रहेको छ । यसअघि निर्माण टिमले फर्स्टलुक भिडियो, फर्स्टलुक पोस्टर र टिजरमा धिरजलाई मात्र स्थान दिएको थियो । तर, मंगलबार निर्माण टिमले जसिताको पनि फस्ट लुक सार्वजनिक गरेको हो ।
सार्वजनिक पोस्टरमा जसिताको क्यारेक्टरलाई देखाईएको छ । पोस्टरमा एकातिर उनी शान्त भावमा देखिएकी छन् भने अर्कोतिर डान्सिङ मूडमा प्रस्तुत छिन् । पोस्टरमा उनको चरित्रको नाम ‘रुबी’ उल्लेख छ ।
कोरियोग्राफर रेनशा वान्तवा राईको निर्देशनमा बनेको यस चलचित्रमा धिरज र जसितासँगै अरुण क्षेत्री, प्रेम सुब्बा, लुनिभा तुलाधर, पल्पसा डंगोल, राजु भुजु, सुजता राई, सूर्यमान लिम्बु, विकास जोशी, रिजोन परियार, सुशान्त गौतमको पनि अभिनय रहेको छ ।
आइकोर फिल्म्सको ब्यानरमा निर्माण भएको चलचित्रको प्रभु शमशेर जबरा र प्रज्ज्वल शमशेर जबरा निर्माता रहेका छन् । चलचित्रमा रोहित शाक्य र कालीप्रसाद बाँस्कोटाको संगीत, सुशन प्रजापतिको छायांकन, निमेष श्रेष्ठको सम्पादन रहेको छ ।
जसिता ४ वर्षपछि पर्दामा यस फिल्म मार्फत फर्किन लागेकी हुन् ।
Comments